يا ساتر يا رب - من سلسلة أحلام مصطنعة

بأحبك يا مصر ولو تكرهيني
بأحبك مهما طلعتي عيني
بأحبك بعقلي وقلبي ويقيني
يا تحبيني كمان يا تزهقيني
---------------
أقولك كلام وإنتي إسمعيني
---------------
كان ليا فيكي أيام خوالي
حلوة حلاوة مزاجها عالي
كان قلبي شاب وبالي خالي
دلوقتي تشوفي ترقي لحالي
أصبح صباحي أودع عيالي
أروح عالطابور فاقد امالي
حالحق رغيف علي قد حالي
ولا حاموت موته نعالي
طب شفتي شكلي؟ فاقد جمالي
زمان بنظرة كنت أشبك غزالي
----------------
حاقولك كمان بس تعالي
----------------
يا مصر ياللي خيرك ماليكي
إحنا ولادك وغيرنا ماليكي
ضنا وغالي وروحه فيكي
نعشق ترابك ونبوس إيديكي
تضني علينا نطبطب عليكي
تضمينا نزيد عشق ليكي
تنور حياتنا بنور عنيكي
----------------
يا ساتر يا رب!!!!
----------------
أنا كنت باحلم ياسلام
باحبك يا مصر مافيهاش كلام
لكن باحبك فايقة و تمام
مش نعجة عاجزة وسط اللئام
ولا لقمة سايغة لعز وحسام
ولا طير جريح ف غية حمام
يا مصر ياللي همومك جبال
ولادك أسودك يامو العيال
نفسي أشوفك آخر جمال
صبية ولادها زينة الرجال
نطهرك من اللي نصب وإحتال
واللي قتل وإغتصب وإغتال
نفسي كان يبقي حقيقة ماهوش خيال
والحلم عشان يتحقق مش لازم يتقال