الأحد، 11 ديسمبر 2011
إنضفي
صورة من حالك يا مصر
واحد من الدلاديل ... خرج وعاره دليل ... نبح ككلب القصر ... صبح ف السجن ذليل
واحد بواقي نظام ... صبح ليل هدام ... جعر وهددنا ... دلوقتي صبح خدام
واحد علي الكنبه ... مربوط بالسلبه ... تحرك فيه تهز البيه ... يرد سيبك بلاش غلبه
صورة من حالك يا مصر
تساؤل مشروع
حكمة هرش رأسية
لو قابلت انثي في طريق حياتك .. اركنها علي جنب وأكمل المسير .. فهن كالحفر لا تراها عادة إلا عند الوقوع فيها
يا مشير
الثلاثاء، 6 ديسمبر 2011
ســــلام للـــي
للي ثاروا عـ النظام
واللي قالوا خلاص حرام
واللي باتوا فـ الخيام
مصر بعتالكم سلام
---------
للي ضحوا بنور عينيهم
واللي داس عسكر عليهم
واللي فـ الشده تلاقيهم
مصر بعتالكم سلام
---------
للي واجهوا رصاص نحاس
واللي نادوا مصاب يا ناس
واللي ثاروا مـ الأساس
مصر بعتالكم سلام
---------
للي واجهوا طلقة الخرطوش
واللي عادوا الظلم وكشفوا الوشوش
واللي نزولوا الميدان ولا رجعوش
مصر بعتالكم سلام
---------
للي إتصاب والحجر ف إيده
واللي إتسحل من عبد نظام وهوا سيده
واللي نكد علي شرطي مجرم ف يوم عيده
مصر بعتالكم سلام
---------
للي نصب للخياله وخيلهم كمين
واللي قال للجمل إبرك قاله آمين
واللي خلي الزمن واقف يشاهده سنين
مصر بعتالكم سلام
---------
للي إنضرب رصاصه ف دماغه
وبعد ما مات قام للي ضرب جاب داغه
واللي بدمه كتب كتاب حريته وصاغه
مصر بعتالكم سلام
---------
للي نصبوا في عز البرد عالأسفلت خيمه
واللي ناموا ف الطل يتغطوا بأي غيمه
واللي أهدافهم لسه واضحه ومستقيمه
مصر بعتالكم سلام
---------
للي صلوا قدام العساكر صلاة العصر
واللي إنداسوا علي الكوبري وعصروا قلوبهم عصر
واللي عددهم ما كان له حصر
مصر بعتالكم سلام
---------
للي صاموا وقت ما كان الفطار
واللي حولوا إنهزامهم لإنتصار
واللي عاشوا ف الميدان وقت الحصار
مصر بعتالكم سلام
---------
للي راحوا هناك لجل ما يشيلوا الوزارة
واللي هدوا السور قدام العماره
واللي نسفوا خط غاز بايعينه بخساره
مصر بعتالكم سلام
---------
للي نزلوا عشان الإعتصام
واللي قالوا كفاية يا عسكر حرام
واللي جوه الميدان حافظوا ع النظام
مصر بعتالكم سلام
---------
للي صبروا علي تشويه الكلام
واللي قالوا عنهم شوية لئام
واللي وصفوهم بأوصاف سخام
مصر بعتالكم سلام
---------
للي وقفوا تحت شمس زادت من سمارهم
واللي علوا هتاف وطالبوا بثارهم
واللي لجل الثورة فاتوا ديارهم
مصر بعتالكم سلام
---------
للي فرضوا إراده علي نظام واعوانه
واللي ضموا شهيد جوه أكفانه
واللي صلوا عليه وهوا ف مكانه
مصر بعتالكم سلام
---------
للي ثاروا وحققوا وجودهم
واللي جه الأمن يكسرهم نشفوا عودهم
واللي ندروا مصر تتحرر ووفوا بوعودهم
مصر بعتالكم سلام
---------
للي فتحوا ورود ف جناين الأسفلت
واللي نعشهم من اللي شايلينه يفلت فلت
واللي كتبوا بدماهم حايمشي قبل يوم السبت
مصر بعتالكم سلام
---------
للي سال علي وشوشهم خيوط الدم
واللي فضلوا ينزفوا والجرح لسه ما لم
واللي إتصاب قالوا له إرجع رد أرجع مين يا عم
مصر بعتالكم سلام
---------
للي دبوا علي أرض الميدان برجليهم دب
واللي قالولهم الحياه حلوة قالوا الشهادة أحب
واللي صبوا دماهم فدا حرية وطن صب
مصر بعتالكم سلام
---------
. . . . ولسه مصر بتبعت سلام . . . .
الثلاثاء، 29 نوفمبر 2011
رســـــــالة
الأحد، 4 سبتمبر 2011
السجن
وضربتم جدور الظلم في وطني
مصير الحق في الودان حايزن
وأكسر قيود دبِلت غصني
والأرض اللي إتجعدت من الأنين
ترجع خضرا والحق فيها يزين
والسجن اللي رويتوا شجره اليابس
بالقهر وظلم المحبوس م الحابس
حايصبح جمر والع علي الخايس
والأرض نبتها ملايين كلهم فارس
طوفان جاي للظلم كانس
وعلي كل من خان الوطن دايس
وكل فجر جديد نشوف الوطن
مكسي عدل وتوب الحق لابس
الاثنين، 29 أغسطس 2011
إهداء إفتتاحي لجروب ... مكسرات ... الأدبي
والفسدق واقف محتار
قصة ولا شعر أختار
عيني عـ الجوز لما يدندن
وآدي اللوز عمال يحكي
وأنا مش قادر امسك ضحكي
والجيران مش راح تشكي
سيدي عـ اللوز لما يفنن
وهناك قاعدة الاخت سوداني
بتكتب خاطرة وماسكة وداني
ولو سكتت أنا أقول تاني
بص عليها لما تشعنن
ودا صنوبر شاعر فصحي
تسمع شعره فوراً تصحي
ولو زعلان زعلك يمحي
واد يا صنوبر دانتا تجنن
آل والكاجو عامللي خواجه
كاتب قصة إفرنجي دباجه
إعدل إقلب ما تفهم حاجه
وآهو الكاجو بقي مطمن
مكسرات جروب كله تسالي
شعر ،و قصة ،و أدب عالي
والكل فيه عزيز وغالي
مولود سوا نكبره ونسمن
الاثنين، 1 أغسطس 2011
هلاوس ما بعد الثورة
العيد أولاً
ولا يجب الإلتفات لإشاعات الرويني بأن الاعلان الدستوري تضمن أن رمضان أولاً يليه العيد
الجمعة القادمه (( الشعب يريد العيد أولاً )) ودي الارادة الشعبية
وبلاش تلجأوا لدجالين
سؤال: اجتماع رئيس الوزراء شرف والقائد الاعلي طنطاوي إمتي ؟؟؟؟
الرويني مش من اللواءات ... الرويني بتاع إشاعات
حتي شوفوا بيعملوا ايه مع البقر؟
ولا يلتفت لأي احكام قضائية قد تصدر بالمخالفة للأمر السابق الذكر
يطبق من تاريخ نشره في الفيسبوك الرسمي
الأربعاء، 27 أبريل 2011
حمام مصر
لما شافوني باغتصب
قاموا يستروا عليا
قاموا وف ايدهم إيمان
طايرين ف السما كما حمام غيه
ضرب عليهم اللي طغي
بألف خرطوش ورصاصات حيه
طار الحمام ... واجه الرصاص
مات من حمامي ميت ثمانية وشويه
واتصاب من غيتي آلاف
غير اللي اترشوا بالنار والميه
يا حمام الصبا حياتك عندي هدف
وانتا الممات عندك صبح غيه
يموت اللي ضرب حمامي
واللي انضرب من دمه اتولد صرخة مدوية
ياللي اعتصبت الوطن ... بره ... الأرض دي ليا
ياللي اغتصبت الوطن .. اياكش فكرت الحال حايدوم
فكرت يعني حمامي من غيته مش حايقوم
فكرت ان المصري مالوش يقوم م النوم
حقيقي باشكرك علي جهلك يا موهوم
حمامي لما رفرف بجناح حريته نادي
ارجل يا مغتصب ... خلاص بزياده
الشعب اللي بان خاضع لطغمتك
وخلي الخسيس في غيه إتمادي
هو الشعب اللي ف الميدان وقف
ولحاشيتك عادي
الشعب اللي بهر مخاليق ربنا
ونساكه وعباده
صبح شعب مرغوب
له احبابه وزهاده
بعد ما كان موكوس
برئيس وأولاده
وطغمته السارقه
وعبيده واسياده
وحيزبون شاده وشها
تابت لقبها .. والثابت ف عملها فساده
يا مصر ولادك طردوا اللي اغتصب شرفك
وبكرة يطهروكي وينضفوكي من قرفك
ويرحبوا باللي تحبيه ويجي من طرفك
وتشبرقينا بقي يا شابه من ترفك
وبايد ولادك ترجعي زينه البلدان
وتكبري ولادك وولاد الولدان
وتربي حرية في كل ميدان
وترجعي ستهم زي زمان
وتحرري بحمامك سائر الأوطان
القصيدة فيديو علي يوتيوب : http://www.youtube.com/watch?v=cVzs6eRStEQ