هلوسه

 ساقع أوي الحضن خالي ... برده شديد في حر الليالي ... أحضن أوي وحدتك تبت عليها ... إنتوا الإتنين شكلكم ثنائي مثالي

صيد

طعمت قلبي ورميت سنارتي في بحر الهوي ... غمزت وإرتعشت السناره في الهوا ... سحبتها متمني حورية ف خيالي ... طلع القلب مجروح وبملح الوهم إكتوي

صباحيات

مات الكلام وإندفن جوه الشفايف ... والإبتسام صبح دليل عاللي خايف ... إوعاك تصدق بوادر فرح وسط الهموم ... مهو كل مرة يطلع سراب وآديك شايف

شعبوليات إنتخابية

أنا بأكره عمرو موسي
وبأكره إسرائيل
ماهو واطي زيهم
وفيه مليون دليل

إيييييييييه ... إيييييييييه

انا بأكره عمرو موسي
بأقولها لو أتسأل
وكمان بأكره شفيق
اللي قتل وإتقتل

إيييييييييه ... إيييييييييه

أنا بأكره الفلول
ومجلس العساكر
وكل اللي معاهم
واللي شايف وناكر

إييييييييه ... إييييييييه

البلد دي حتنضف
وحق الشهيد يعود
واللي سرقوا ونهبوا
بكرة ياكلهم دود

إييييييييه .... إيييييييييه
إييييييييه .... إيييييييييه

إنتخابيات

يا مصر يا رحايه ودايرة علي الكل ... فيكي اللي إتهرس بكرامه وفيه اللي عايش سليم بالذل ... الرحايه مش هيا اللي بتنقي ... أصل الكريم دخلها أما الذليل واقف بعيد بيطل

بخار ميه

يا مخلب الدنيا مغروس في فلبي ... الجرح نازف ولا فيه طبيب جنبي ... ماهي جروح الأحبه مالها دوا ... تنزف بحور واللي جرح منها يعبي

دامت لمين؟

ياللي متبت فيها
دامت لمين؟
لا السلطة دايمه
... ولا البشر دايمين
أصل الحياه فنا
حقيقه ف كل دين
أصل الحياه رحله
والبشر عابرين
غيرك لو دام للكرسي
ما كنت تقعد عليه لو بعد ألف سنين
ياللي متبت فيها
أعمل لآخرتها
والجري ورا كرسي
فيه خراب بيتها
غيرك جري جريها
وآدي آخرتها
ضرب البلغ طاله
وخرجت عليه البشريه بعزتها
إرحل ...
كلمة قالتها الناس ما تنتها

الغربة

ناس كتير فاهمه الغربة سفر ... البعد والمسافات تعبير مختصر ... لكني شايف الغربة جوة الوطن واقع ... لما تحس إنك وحيد وسط البشر

آآه يا دنيا

آه يا دنيا يا معانده فيا ... فيكي مشاعر الفرح والحزن هيا هيا ... مش لما نحزن أو بنفرح دموعنا بتنزل ... الدمعة دي زي الدمعه ديا

أي كلام

تكمل طريقك لوحدك وارد طبيعي ... لا كل أيامك خريف ولا كلها مرت ربيعي ... ماهي فصول العمر آخر عجب ... وأعجب ما فيها ناس صنعتها بيعي

عيد ميلاد

آدي كمان سنه
عدت علي الفاضي
لا دنيا راضيه بيا
ولا بيها أنا راضي
مولد وألوان وبهرجه
شاغلانا عالفاضي
...وكل م أستقبل سنه جديده
آلاقيها طبق الأصل م الماضي

سنه عدت وإيه يعني؟
لسه بأكلم نفسي
وبأسمعني
بأقول أي هلوسه
ولا حد يمنعني
أزعلني حبه وأخاصمني
أرجع تاني أصالحني

م دا طبع اللي ع الوحده متعود
يمشي في طريق الصحبه
يلقي الطريق حود
يغلب لحد م يلاقي طريق تاني
يدهنه أبيض لونه يتسود

ماشي زمن وداس كام طريق
يدور علي خل وفي يكون صديق
لا كمل ف اللي إبتداه
ولا فطريق وصل منتهاه
ولا نال قلب إشتهاه
وبعد اربعين وشوية زمن
لسه بيدور علي من لم لقاه

مين؟

ودا مين الأهبل اللي يقدر يخوف ناس راعباه ...
واجهت الموت بإبتسامة حياه ...
ناس إختشي الموت يبص ف وشهم وقت لقاه ...
كان الموت بيجري منهم يستخبي ...
والشاب من دول نفسه يتقطع جري وراه ...
ولو نجح الموت في لعبة الغمايه معاه ...
يرجع الشاب لخيمته والتعب أعياه ...
 يرجع علي امل يعيش بكرة منتصر ...
أو يموت برضو مبتسم يا هناه ...

الحرز

أنا شعب وله قضيه
من سنين وهيا في الأدراج
طلبنا الدفاع قالوا منتهيه
... كان ردنا هجوم فتح الأدراج
فضينا أحراز التاريخ وهيا مستحيه
مصر الصبيه بأهلها
العجوزة ف شكلها
مع أول حرز
بان علي وشها الإحراج
أكفان محشيه بالأموات
واحد عشان رغيف مات
وده ضحية أزمة م الأزمات
ودا طفل شارع وله علامات
وده مات لإنه م طقش سكات

فضينا أحراز التاريخ والزمن شاهد
والشعب مدعي بالحق متعاهد
يجيب حقك يا مصر ويعاند
ولو ضد المغول إتواعد
ولو موت إبنك حايساعد
فدوكي الولاد مابين واقف وبين قاعد
وبين راكع وبين ساجد
ومصاب علي الرصيف وسط المعركة راقد
بيدعي ربنا ينصر عبيده ويساند

بصيت كدا علي شمالي
لمحت اللي أجرم ف القفص قاعد
والدفاع بدأ المرافعه بصوت عالي
سيدي القاضي طمعان ف ظلمكم
تبرأوا مجرمي إكمنه عزيز غالي
قتل صحيح معترف والحرز شاهد
لكن القتيل مهوش غالي
يا حضرة القاضي إفتكر
مين وصلك لوضعك الحالي
ماهو لولا مجرمي وحاشيته
كان كرسي حضرتك من حضرتك خالي

طاطي القاضي قرعته وبص لمساعديه
شال العدل اللي وراه ع الحيط غمامة العين
وبدمعه لونها دم بص عليه
نطق القاضي بعد المداوله الحكم قرار
يفرج عن المجرم براءه
ويُسجن الثوار 

غريب

غريب أوي
ماشي ف الطريق تايه
لا فاكر البدايه
ولا باين له نهايه
كان فيه صُحبه معايه
إفترقنا ف وسط الحكايه
... وآديني ماشي بادور
جايز علي غيره أعتر
نكمل باقي الطريق لو نقدر
أو حتي أكمل لوحدي
ولو بإيدي أخليه يقصر
غريب أوي

المهر

آدي مهرك يا صبيه 

ألفين من الدنانير

ودي صرة دهب 

ودي بؤجه مليانه حرير

لكن الحقيقه للعجب 

مش هوا دا التقدير

... قدرك ملكة 

وأنا ليها أمير

لو حد بصلها 

أغضب أنا وأغير

تهمس تناديني 

ف ثانيه تلاقيني 

أفديها بحياتي 

وعمري وسنيني

لو لحظه تغيب عني 

أشواقي تكويني 

أناديها بموده

يضمها حنيني 

دا لإنها روحي 

وأصل تكويني 

وأنا جينها 

وهيا من جيني 

ملكة وأميرة .. إيه إسمها؟!

أرجوك إعفيني 

محبرة

ياما القلوب دقت عليها طبول 

الحزن هوا الدباجة
والسعادة هامش الكشكول

... حزن مكتوب بحبر الزمن

وسعاده رصاص بأستيكه تزول

لو أقلب الصفحه وأجددها

المحبرة تملاها سواد مكحول

حتي الهوامش تدوب 

ودا شيء مهوش مقبول

لكن السعاده كدا .. هيا كدا 

مجرد شخبطة بسرعة تزول

وتفضل الحياه علي دا الحال

لحد يوم مـ نلقي الكتاب مقفول

إنتخابيات

للي خان بلده وناسي ... وداس بظلمه رقاب ناسي ... ومترشح علينا وعامل ناسي ... اللي زيك ملوش غير مداسي ... سوا كان خنيق أو دبلوماسي

صرخة

ياللي سايقين الهباله
ننسي دوركم؟
إستحاله
... لا قضا سبتوه ف حاله
والجيش عاملينه برياله
والضمير جواكوا مات
من الجيوب دايرين جبايه
والسلوك قله ربايه
والفساد دا كمان حكايه
وإنتهاك أعراض حريمنا
وإسألوا أمو عبايه

يا عسكري الفاسدين
لما يغوروا مين يحميك؟
قولي مين؟
أسيادك أخلاق مافيش
والشكل بني آدمين
بكرة نجيبهم والعدل يسري
وع المشانق يصبحوا متعلقين

قال الحكيم

قال الحكيم

ما ضاع حق وراه مطالب

طب واللي ضاع

وهوا للحق طالب؟

طب واللي مات

... وكانت الحياه أحد المطالب؟

ضاعت حقوق

نهشوها الخسايس بالمخالب

مش دي حقيقه؟

مش الخسايس أُس المصايب؟

ماهو ركوع العبيد للعبيد

داء وصايب

حكيم غيره قال

عيشوا بشرف .. جتكوا القرف

أصل الكرامه

ماهيش ترف

نزع الحقوق

ماهوش خرف

والثورة قامت لجل الحقوق

ضد كل اللي إنحرف

وآدي الجميع شهد لها

والكل بيها إعترف

الإتنين 23-2-2012

مصر والإتنين سكانك ...

نظام فاسد وعبيده بيهم الكل دانك ...

وثوار احرار دمهم علي ثوبك زانك ...

ناس عاشوا يقتلوا ولادك ...

وشباب ضحوا وماتوا عشانك ...

فاسد واعوانه خانوكي ...

وشباب عاشقك عمره ما خانك ...

ثورة حتي النصر 21-2-2012

انا عمري ما كنت خايف

زي النهاردة

خايف ترجعي تاني

ف حياتي حاجة عارضة

زي الفرح و...السعادة

والسياسة والمعارضة

خايف

وخوفي دا مشروع

وعارف

إن مافيش رجوع

أحرار

وصوتنا بقي مسموع

مساجين

لكن الجبين مرفوع

شهداء

زغاريد ماليها دموع

قلب

علي البلد موجوع

خايف

لإن النفوس ضلت

وبعد النوم ف الطله

ويوماتي الناس سوا صلت

صبحت علينا جمعه

ونفس النفوس جمع ما صلت

وكل واحد عمل فرقة

والخلايق من كدا ملت

واللي فقد سلطانه بيتنهد

وبالاب والابن والحيزبون بيتلت

وداير ينفذ وصايا الأب بحروفها

والفوضي ع الفاعلين دلت

والاب بيقول لعياله

آدي العبيد إتسلت

لأ

خوف إيه اللي يصيبني؟

أنا اللي النخوة

صاحب مصاحبني

وزميلي اللي وقف يوم الغضب

يداوي جرحي .. وبنظرته يعاتبني

ليه حميتني بكتافك

وحشت رضاصة كانت ليا اصيبها وتصيبني

انا مش خايف من اللي جاي

ولا فيه ف قلبي ذرة شك

وبكرة افكر كل عداي

إن الفاسدين باب واتسك

والمولي ناصر ثورتنا

بس الساسه يبطلوا عك

رافض للمعونة 17-2-2012

أنا رافض للمعونة

رافض ع القفا يلطعونا

ولو ح ناكل عيش بدقه

أكرم من ذل العفونه

... واللي بيطالبني أساهم

البعيد باينه واهم

ساهم إنتا بكل مالك

وبعدها يبقي التفاهم

حسان وطيب والفلول

والكل بيلعب ف العقول

لابس دقن وجلابيه

وهوا خدام المغول

دول هما عبيد مبارك

اللي خلوك كاره لجارك

ومكان ما سيدهم يقول

كان يقولوا إربط حمارك

الا م سمعنا عويلهم

ع اللي طلعوا وشدوا حيلهم

هدوا أركان النظام

ودولا بيعضوا ف ديلهم

أي سلطة تيجي تحكم

يجي راكع وبايده يبصم

يسجد يمجد ف اللي حاكم

ولو سقط تلاقيه بيلطم

يا حسان كلمه حاقولها

مصر ربنا حامي عقولها

ولو عاوز تجمع معونه

اشحت ولا عمرك تنولها

بكرة حانجمع معونه

لما ننتخب ناس يحكمونا

ولا نحتاج دعم غربي

ولا اللي زيك يقرفونا

عدل الإله 14-2-2012

لولا علو الصوت

وإنكسار الرصاص

... ورغم ريحة الموت

وغياب القصاص

وشجاعة فاتت ف الدروع فوت

وموت ما كان منه مناص

وقف الزمن مبهوت

والتاريخ بيدون كلمة القصاص

لولا دا كله

كان البعيد لسه حاكم

وإبنه لساه للعبيد شاكم

والعبيد ما لهم ديوان مظالم

ولو يشتكي العبد منهم يطلعوه ظالم

والتهمة إشتكي ... والحكم آثم

لكن خلاص الصوت عدي جدار الخوف

عدي وداس علي رقبة الحلوف

وداس معاه م الكلاب صنوف

عز وسرور وحبيب والباقي مش موصوف

ولو مش مصدق تعالي ع السجون شوف

اللي فسد بعد الحرير متغطي بخرقة صوف

نايم علي البرش ف الركنة دي محدوف

فز قوم عندك زياره ... صوت الشاويش مألوف

نفس الشاويش دا اللي ع اللقمة عاش ملهوف

بينادي ع المحابيس ووشه بقي مكشوف

لا عاد خايف ولا قلبه ساكنه الخوف

آدي الوزير نفسه محبوس وسط ألوف

والتهمة إجرام والمظالم علي رقبته سيوف

ومهما طمسوا أدلة م المظروف

عدل الإله ساري ودا شيء معروف

وبكرة نكمل اللي بدأ أو نرحل شهدا لربنا

ماهو كل اللي ف الدنيا ضيوف

عدت سنه 11-2-2012

عدت سنه يامه

ولسه فيكي الداء

لا علاج نفع يامه

والإخوة زادوا عداء

والمفسدين لمه

جمعولك الاعداء

وادي الولاد لامه

من طينك الأشلاء

ويكوموه لمه

ويصنعوا ترياق

عزم وعليه همه

والأصل ف الاخلاق

هما الولاد همه

يبدوا لمصر ولاء

بكرة النهار لمه

يطلع يزيل أنواء

يا مصر دي غمه

علي طره نرحلها

نلاقي وشك راق

تصبحوا علي حرية

لما تكون الأيادي السودا مرعوشين ... والوشوش الشيطانية مكرمشين ... وتلاقيهم ع الكراسي معششين ... يبقوا عصابه كبيرها إسمه مشين

صامد 31-1-2012

أنا إنتصار الحق عـ البهوات

أنا ضي الصدق فـ الظلمات

أنا اللي واقف ف الميدان صامد

ولما إنقتلت قالوا بلطجي مات

-------

أنا إنتا وكل الناس

صحاب الدم والاحساس

رفضنا نورَّث الواطي

وقطعاً رفضنا إننا ننداس

-------

ظهر بينا صلاح الدين

أيوبي ومن عابدين

وقف ف وش خرطوشهم

حمي البيوت والميادين

-------

ورَّانا الميدان آيات تترتل

مابين مصابين وشهدا بتتقتل

كان الدعا والصلاه منجا

من شياطين علينا تتكتل

-------

يا أولياء فـ الثورة صالحين

اللي معاه ربنا يقدر عليه مين؟

هما عبيد فرعون وهامانه

وإنتوا بالإيمان جامدين

-------

الثورة دي نور من ربك

خليك ساير بقي علي دربك

ومهما قالوا فيك العبر

كمل وإدعي ربنا يزول كربك

-------

حكمة مهياش متباعة

لك سهلة وعالخسيس مناعه

دولة الظلم لحظة

والعدل دولتك لحد ما تقوم الساعة

نازل بكرة 24 -1-2012

يوم ما خرجنا بالعشرات ومن الضرب مسارنا إتغير

مين كان عارف إن الثورة أكيد حاتغير؟

مين فينا صدق إن الحلم معادش صغير؟

...كان فينا واحد بس مصدق والباقي لأ

الواحد ده أنا , إنتا , لا دولاهما إن جيت للحق

اللي نزلوا كان الكل هوا الثورة وهوا الحق

نزل الواحد دب برجله فوق الطاغي ودق

دق في نعشة مسمار زلزله وعمل شق

وبعد ما فات العام دا بطوله

رجع الشاب وجدد قوله

لسه بواقي نظام وطبوله

والإعلام محشي بفلوله

حتي القضا حاكم ب قالوله

والمخلوع أدوية يدوله

والمجلس شغال دلدوله

بص الواد وقال عند أمه

بكرة معاد نزحف ونلمه

ونعلقه في ميدان الثورة

ندبحه ونشرب من دمه

بكرة نخرج تاني ملايين

ع الميادين زاحفين زاحفين

يقولوا مؤامرة يقولوا تخريب

ويتخبوا في السراديب

بعد ما قتلوا شيخ وطبيب

لا وكمان منعوا الأنابيب

ولا بطلوا حتي تهليب

والمسخرة كم الأكاذيب

والتلفيق ويا التعذيب

وبعد دا كله تقولي أغيب

لا أنا نازل وانا ما باكلش من الألاعيب

نازل أقول للعسكر يرحل

عيب ما تجيش؟

هوا انا قلت قرش حشيش؟

العيب فعلاً لما تكون سياسة مدنيه

يقوم يتدخل فيها الجيش

تخرب طبعاً

ونسلبس بعدها كلنا خيش

أشوفك بكره ... إياك ما تجيش

صعيدي حر

جالوا زمان إشرب يا ولد من نيلها ...

وشربت ...

ولحد دلوك أني شارب ...

دا حتي الكوع عم ينجط من سيل الدما الهارب ...

ولما ادندن ع الربابه اغنيلها ...

... ويوم موتي فداها فوج بيتي يعلجوا كهارب ...

ويوم مخرجت احررها ...

جالوا دا واد بلطجي هارب ...

يا أمي يا فطماني علي جوع ...

خلاص معاد فيها رجوع ...

عنحررك م اللي نجس محاربها ...

ما اللي ربته الحره ما يعرفشي لغير ربه ركوع

الشهيد

أنا اللي نادوا إسمي عـ الصراط

وسط علامات التعجب ردت ملايكة

أصله إتكتب شهيد وقت الممات

بصوا ليا ناس كدا شبه الكنب

سمعت صوت حسره وسط السكات

وناس هناك كانوا عبيد بعض العباد

همسوا يرحم ضميرنا اللي مات

خطيت بيميني أول خطوة ليا

وسط ملايين بتشاهد وبتدي تحيه

والصراط اللي حكولنا إنه رفع شعره

كان واسع أوي يساع بدل الشهيد ميه

خلصت خطواتي فوق الصراط

لقيت قدامي باب جنه وملايكه مستنيه

دخلت من الباب وقلبي مـ الفرحة يتنطط

لقيت أهلي واهل الاهل في استقبالي

وحور عين مغرمه ومرحبه بيا

وسمعت صوت من ورايا .. نلتها يا هلالي

الصوت مهوش غريب عليا

دا صوت الشب اللي إنضرب يومها قبالي

يومها حضنته من غير سابق معرفة

ويومها همست ف ودنه .. عقبالي

الرجا

أنا اللي شايف الرجا علي مد الشوف ... وأنا اللي قلبي ما عاد يخاف مـ الخوف ... قضا مكتوب والكل حايشوفه ... نصيبك ييصيبك ولو من بين ألوف

آآآهة مستخبيه

انا كنت خايف مـ الوجع طلع الوجع مقدور ... والدنيا علي الخلايق كما الرحايه تدور ... والخلق جواها غلة مطحونه ... تدخل صحيحة تخرج عليله لما يجيها الدور

الوجع

أنا اللي راضي بالوجع
أصل الوجع كاري
لو طل مرة فرح
عليه الوجع بيداري
والبسمة اللي إتسربت
... بين الشفايف تنكسف
ومش بإختياري

مـ أنا اللي راضي بالوجع
والناس تشاور
واد جدع
والجدعنة عندي أنا
حبة خدع
زيف عـ الشفايف
ضربة ودع
دجال وعامل
شوية خدع

ملعون أبو دا الحال
اعيش كدا؟
دا محال
إما أموت أو بين الوجع والفرح
أعيش أنا رحال

كبسولة سن دبوس

وانا كنت فاكر الوطن ... حبة شجن ... طلع الوطن شعاع أمل ... هربان من وسط المحن

خير مصر

يا خير مصر
يا طرح نيل
غنا ومواويل
لما احب أنعتك
نعتك جميل
... شباب غار
ثار وإستثار
نخوه رجال
عملوا المحال
والهمه عال
ولسه الفساد
تلال ... جبال
لكنهم
ويا سعد مصر
وسعدهم
كما الوتد
لما يتدق
يصبح سند
لكنه وتد نوعه عجب
له جواكي جذور مالها عدد
لو ينزعوه من جوه أرضه
يرفض يسيبك للأبد
يحرقوه ... يقطعوه
ينبت مكانه مليون وتد
وهوا بعد ما كفنوه
جوي طينك يدفنوه
ويصبح رقم ضمن العدد
ترجعي بعد السنين
تحضنيه
تطمنيه
تقولي ليه
هما ديدان عـ الارض ماشي

وإنتا يا ضنايا الولد

ثوار البلد

ناديت يا ثوار البلد
مـ تيجوا نفقد الأمل
ردوا عليا
وهوا دا شيء يُحتمل؟
كله إلا دا
ممكن نموت أو نُعتقل
لكن نعيش كدا فضا؟
حبة كلام بلا عمل؟

وقت السكات
يفضل أملنا يإمنا
ووقت الممات
نحضن فـ حلم ضمنا
نحرر بهية من عصابة
نفديها حتي بدمنا
ماهي أمنا
ما إحنا هيا
وهيا حته مننا

ماهي دي اللي علمونا
فـ الصبا نغني ليها
نبيع أرواحنا فداها
ونشتريها
ومهما فيها العيش يمرر
نبعد لكن نشتهيها

نفقد إيه بعد اللي فات؟
املنا هوا اللي بيداوي
جروح كتير ويا آهات
الأمل جوانا باقي
حتي لو بدنا مات

قوم

اللي مات علي أرضك هوا الضحية
واللي قتل عسكر سلاحه بندقيه
واللي سكت خسيس باع الق...ضية
واللي في القصر قاعد ف الوسيه
قوم يا حر وحرر بلادك من العبيد
قوم الجرح نزفه قيح ويا صديد
فوم قبل ما تقوم القيامة
ويومها تشرب مصهور الحديد
قوم

يا عسكر يعروا

يا عسكر يعروا

عروا بنات البلد

البنت اللي إتعرت

أجدع من أشرف ولد

في المشهد شفتها حشمه

وشفت كلاب مالها عدد

سعران بينهش في الجتت

وعبيد بتعبد عبد ما ينعبد

ومسيلمة الكداب من تاني ظهر

علي قنوات الكدب المعتمد

وإنتي يا زينة مصر ودرتها

ضفرك برقبة كل البلد

واللي ضميره لسه بيقاوح

إدفنه لإنه فسد

شوفي يا بنت الاكابر

شرفك في قلبنا وتد

وبكرة تشوفي قره لعيونك

مصر تتحرر عشان بنت بمليون ولد

تصبحي علي خير

تصبحي علي خير يا مصر

وماتزعليش

أبوس إيديكي

ماتعيطيش

بكرة نهار وشمس غير

... ويا مين يعيش

بكرة يوم وتفرحي

دا وعد ربك ومتنكريش

مش ربي قال إن مع العسر يسرا؟

وإنتي ف عسره وم بتشتكيش؟

بكره نهار واليسر طالل

وعد الإله م يتنسيش

بكرة يا مصر حافكرك

بس إنتي قومي ومتخافيش

عارفه يا مصر؟

عارفه يا مصر ؟

أنا مصمم تنضفي

وإن كان حياتي ثمن

... ماهوش كتير لو تعرفي

فيكي بعض العساكر عار

فيكي حبه عبيد

وفيكي كمان أحرار

وفيكي ثوار شبه المهاجرين

ولسه لم نشوف لهم أنصار

ورغم إنهم في الدرب سياره

بيستمدوا عزمهم من ربك الجبار

وبرغم الحصار والمطارده

مكملين وحايوصلوا للدار

وعلي أطراف الميدان

راح يظهروا الأنصار

والشمل يتلم ونحتفل

ونصبح علي هتاف ثوار

ادي المجلس المجرم

عزلوه ولادك الأحرار

حبة حبشتكانات

• صباحك يا مصر نادي ومنور ... وشك بلا عسكر بدر ومدور ... قمر بس مشوهه تسعتاشر حبايه بروس سود ... ثوارك دكاتره يخلصوكي منهم وادينا عليهم بندور
• 
  
• سألوا الشهيد مرتاح؟ قال لأ ... سألوا اللي قتل مرتاح رد مش حاقول الحق ... سألوا اللي حكم دا عدل؟ ... قال حسب الموالسه والشهود الزور أيوة ،لكن الحقيقه لأ
• دم الشهيد عالجاني شهادة حق ... والقاضي لو لم يحكم عالقاتل يبقي ضاع الحق ... والعدل حايجي رباني ... إوعاك تقوللي لأ
• 
  
• يا شمس حره نورك ساطع غصباً عن الكل ... اللي بيركع واللي بيخنع واللي غاوي الذل ... لو كان الغيم قادر يحجب نورك الفايت؟ ... كانت جبال الظلم قدرت علي زهور الفل

وشوش

دنيا وفيها وشوش متبسمه

ووشوش حزنها آيه متجسمه

ووشوش بريئه تؤتمن

ووشوش رسم عليها... الزمن

طرق تجاعيدها متقسمه

وشوش من نظرة تإسرك

ووشوش بنظرة تفقرك

ودي وشوش من الشقا مغبره

لكنها راضيه بنعمه ربها ومسلمه

طول الطريق وشوش ف وشوش

واللي يدقق في الملامح

يكتشفها فشوش

الوش شكل بحركة نغيره

أما اللي جوه القلب مهوش

الأمل موجود

• انا الوحيد اللي عارف إن الأمل موجود ... ماهو الأمل جوايا وأنا معروف بالجود ... لا يوم بخلت علي الدنيا وهوا جوايا ... والنتيجة حتماً لو بعد في يوم لابد راح يعود

طريق الثورة

طريق رسمه ربنا

خطينا فيه من سنه

ومشيناه

صحبة ورود مفتحه

غدر الديابه نهشها

ورديناه

عتب علينا بعض البشر

حبوا يطفوا ضينا

ضي القمر

سطع نورنا ضوي سماها

ودا قدر

كسر ربنا ... بعزمنا ... شوكة نظام

قاله حاتقدر يا لوا؟ ... قال قدها

وأهو كان كلام

ودا مين دا اللي قدنا؟

مين حتي حصل نصنا؟

هوا اللي حسيبه ربنا؟

زي اللي علي عبد إتكل؟

وآهو إتكل

صحيح فيه ناس ف المعتقل

لكن الورود لسه مفتحه

والعزم موجود

والأمل

وربنا اللي سخر بعزمنا كسر النظام

قادر علي باقي الحطام

قادر ينصرنا علي طيور الظلام

ولو بعد عام

---------------------------

مكملين يوم خمسة وعشرين ألفين وإتناشر باذن الله