إلي شهيد صدق ما عاهد الله عليه ومات شامخاً

في فلسطين الأبيه فيه دماء بتستباح ... وفيه بطل فضل يقاوم العدا والإجتياح ... رفض يسلم نفسه وقاوم لحد ما فرغ السلاح ... من جبنهم هدوا عليه البيت فـ مات شهيد وإرتاح

------------------------
إهداء الي الشهيد
علي السويطي الذي استشهد فجر يوم أمس
http://www.aljazeera.net/NR/exeres/C6EE1D4C-A35D-4E8E-BD09-E45B00930AFB.htm
إنا لله وإنا إليه راجعون

ستيتوسات ومش حابطل

لو فاكر إن تدبيرك في تفكيرك ... ولو عارف إن سرك مكتوم جوه بيرك ... ولو شاكك إن ضلك هوا غفيرك ... كون أكيد إن رزقك ما ينوله غيرك

--------------------

جالك يوم يا أوزون وصبحت نجم شباك ... مخروم صحيح ومرقع لكن الناس بتهواك ... طالع فيها في العالي ومتأنعر ... بس الأكادة ييقولوا زوالك فيه لينا هلاك

هيا كدا صح

لما يزيد إحساسك بالإختناق ... وتلاقي صعوبة في الإتفاق ... إعرف إن فرجه قريب ... ما هو ربك هوا الرزاق

حكمة غصب عنك

وراء كل ثاني أكسيد كربون متكربن ... أكسوجينة متأكسجه

شخبطيطه

شكيت الناس تكون غارقه
وانا غارق
جايز الناس تكون فارقة
ومش فارق
حبيت الناس تكون صادقة
وأنا صادق
لقيت الناس قلوب كارهة
بتتحادق
طيور جارحه
بتتخانق
ألسنه بألفاظ نابية
بتتراشق

وفيه ناس قلوب صافيه
حبها ناطق
ومشاعرفي القلوب دافية
بحرها دافق
وخيرها بحور جارية
والكل ليه دايق
عروق الطيبة فيها ساريه
والكل لها عاشق

فيه كدا وكدا في الحياه ناس
والرك عـ الأصل
ويفضل الصدق سيف الحياه
وليه نصل
خلاصة القول والفصل

الخسيس مسيره بالمداس ينداس
والأصيل علي راسه بالحب ينباس

ستيتوساية واقفة في زوري

في جسد من الجوع ناحل يعمل إيه الرصاص؟ ... نائب خسيس قال إضرب يا أمن وهاص!! ... قامت جموع الشعب وقالت كيلنا فاض وخلاص ... يا إما ياخد جزائه يا إما بإيدنا قصاص

تناتيش هلوسة

جاري البحث عن مصر في كل مكان ... سألت اللي في الشوارع واللي في البيوت سكان ... يا خونا محدش شاف مصر مخطوفة؟ ... قالوا يا ولداه لايد علي صبية معدلهاش عنوان

وجه الشبه بين العمر والسلم

بالنظر لأني داخل علي الأربعين وسبحان الله لسه عايش
وشهيق طالع وزفير نازل ولسان عاوز قطعه وضمير هوا اللي باقي لي
وقلب دوم دوم تك تك دوم دوم تك شغال علي واحدة ونص الحمد لله
قلت بقي أبعزق شوية من تأملاتي عن العلاقات بين الحاجات والحاجات التانية
تقول كبر وعقله خف مايضرش كله اترباله الخفيف صغير وكبير
تقول بيهلوس من اللي بيتعاطاه أقولك الشاي باللبن لسه ما ثبتش إن ليه اثار جانبيه علي فيران التجارب والأمر لسه قيد البحث
تقول اللي تقوله مش مهم الشتمية تلف تلف وترجع للي كاتبها

ندخل في الموضوع

العلاقه بين العمر والسلم
----------------------------
مالها؟
محتاجة شرح دي؟
هيا الحقيقة يعني والشهادة لله مش محتاجة شرح أد ماهي محتاجة فزلكة شوية

العيل مننا بيتولد بيبقي تحت أول سلمة
تعالي بقي لما يبتدي يحبي كده تلاقيه ابتدي يطلع اول سلمة واللي بتمثل اول سنة من عمره
السلمة اللي بيتكحور من عليها كل شوية ويقع يتبط في بوزه وشفايفه تجيب نقطة دم ويرقع بالصوت الحياني
والناس تجري تشيل وتحضن وتطبطب
كله من السلمة الاولي محتاج يتراعي وهوا عليها ويا عيني مش بايده يختار مين يساعده

يكبر اخينا شوية هوا تلاقيه واقف له علي سلمة برجله والتانيه بايده
الكام سلمة دول هما خبرته اللي اكتسبها من ساعت ما كان تحت اول سلمة لحد ما بقي بيقدر يفرد طوله علي كام سلمة
ولسه يا كمالو بصته يادوب علي اد الكام سلمة اللي مسيطر عليهم وفاكر انه ملك الدنيا بيهم

اول ما اخينا يبتدي يقف علي حيله تلاقيه طالع كمان سلمة واتنين بس يا ولداه بيطلع يتسند علي ماما وبيطلع برجل واحدة
الواد في السلمة دي من العمر لسه ناقصه خبره وبقي حويط من كتر ما اتسحل في السلمات اللي قبل كدا لا وناصح وبيتعلم

دخل كي جي وبقي بيطلع السلم برجل ورجل عادي بس وهوا طالع بيقابله سلالم اللي مكسورة يتكعور بسببها
واللي مايلة تميل له رقبته علي صدره
واللي مبرية تزحلق سيادته برجله المبلولة

يكبر اخينا ويبقي يجي كدا شوية سنين تلاقيه بيطلع السلم فريره وكمان ماسك لك في الدرابزين
مش هوا هوا برضو اللي بيعمل كل حاجة بالاعتماد علي الدرابزين اقصد ماما وبابا واخوه واخته الكبار
اخينا بيقدر يختار امتي يمسك الدرابزين وامتي يطلع لوحده
اماااااال ماهو برضو فاكر نفسه راجل وكبير مش طلع له كام سلمة

يكبر ويكبر ويبقي اكثر حذر من السلالم المكسورة والمعوجة والمنحولة اللي شافها قبل كدا
وخطواته بتبقي اكثر حكمة ماهو كل مادا طالع لفوق

وصل الشاب لفوق السلم وبقي في ريعان الشباب واتجوز واتبغدد واتلحوش وخلف عيال من تحت اول سلمه

ويبتدي صاحبنا ينزل السلالم سلمة سلمة زي ما طلعهم
وبعد ما كان بيجري علي السلالم جري
وبقي بينطهم نط وبياخد السلمتين في خطوة وهوا نازل بيبتدي ياد باله من السلالم اللي قابلته قبل كدا

المكسورة يحط رجله بعيد عن الكسر
والناعمة يتبت رجله في الارض وهوا نازل عليها
المعووجة يظبط نفسه عليها
كله تراكم من خبره طلوعالسلم زمان

ويرجع اخينا وهوا نازل يمسك في الدرابزين واللي بيبقي ولاده واهله واللي لسه حواليه
وينزل سلمة سلمة يتقل في خطوته ولسه بينزل
لحد ما يوصل لتحت والسلم يكمل بيه لحد البدروم

وطبعاً البدروم غني عن التعريف

ومما سبق
تتضج علاقة وطيدة بين العمر والسلم
وياريت لما تطلع أو تنزل السلم تاني تخلي بالك من السلمة المكسورة
وابقي فكر إنتا واقف علي أنهي سلمة

شكراً

مأثورات الحكيم أبو شماعة المكوجي - الحكيم في قمة سرت

الحكيم أيو شماعة في قمة سرت
-----------------------


لم يكن حضوري محض صدفه
فقد حباني إبن موسي بدعوة تحفه
لبيت نداء جامعة العرب ببعض نشوه
فهذا نذير إستفاقة من بعد غفوه

قد آن للزعماء أن يسمعوا حكيمهم
وبحكمة أن يتدبروا جل أمورهم
وبشجاعة يحددوا آتي مصيرهم
متوحدون حازم في النهاية قرارهم

وصلت سرتً وكان العقيد حاضراً
قابلته وطول حكمه في ذهني بادراً
جلست في خيمته وكان الحديث هادراً
سنتخذ قراراً سيكون للمحتل باتراً

وبعد في قاعة القمة حضر الجمع
بدا العقيد بكلمات يسيل لها الدمع
رثاء امة هرمت وفقدت النطق والسمع
لفت ناظري غياب زعماء دول سبع

طلب مني إلقاء حكمة أمام الزعماء
تنحنحت برهة وهربت مني الدماء
بدأت بسم الله ورشفت جرعة ماء
لمحت وزيراً وجودي له قد ساء

قلت يا زعماء أمة محمد أمة العربان
أما آن لنا أن ننفض عنا غبرة الهوان؟
أما إن لنا أن نصد من لأمتنا أهان؟
لن يرجع حق بحق إن صاحبه إستكان

يا ملوك النفط مالكم بعتم بأبخس الأثمان؟
يا سلاطين بلادنا أتؤثروا من لشعبه خان؟
يا عُباد الغرب أين حياؤكم في أغلب الأحيان؟
إن أسهبت في قدح خصالكم فلن تكنوا لي إمتنان

يا من سُلطتم علي كل العرب صونوا الكرامه
إسحبوا اعترافكم بالعدو ولا تخافوا إنتقامه
فقوتهم وليدة حشايا خضوع جملكم وسنامه
وإن نظروا منكم وحدة فل يكون لهم قامه

يا من تجمعتم في قمة القاع للتحاور
العدو المشترك علي بعد امتار مجاور
تلهثون وراء مبادرة هي للهوان محاور
تبت مبادره الهوان وتب من لها ساير

أقولها مدوية يا قاده الشعوب المكرهه
لا شعوبكم أسوأ من جهال مكه المكرمه
ولا أنتم بأفضل من صاحب الفيل أبرهه
للبيت رب سيحميه من كيد العدو ومن شايعه