أنا لما قلت يا مصر انضفي كنت قاصد تنضفي ... مش يلموا اللي ثاروا في السجون ومن الاخيار تنصفصفي ... لا والأكادة مسمينهم بلطجية مخربين ... طب راضي حكمك فـ اللي سحلوا واللي دهسوا لحم ولدك يلا وصفي
الأحد، 11 ديسمبر 2011
يا مشير
يا مشير
سمعت صرخة مكلومين
علي فلذة كبدهم؟
سمعت صوت الأنين
من محروقين علي ولدهم؟
كان هوا أول فرحهم
كان هما هوا
وهوا هما كلهم
مات الولد
مات وموت في القلوب ضيها
كاتب باسود كاحل نعيها
ماتت قلوب مطعونة فـ ظهرها
غدرت بيها عساكر مغدورة زيها
واللي غدر
كرسيه خراب علي تلها
يا مشير
حلمت حلم
وواجب التحذير
حافر بإيدك أرضها
زرت المقابر ف المنام
لقيت الشواهد عليها إسمك كلها
الناس عِبَر تنام صحيحة
تصبح عليله تندب حظها
تبات عليله
تصبح مكفونه في قبرها
ياريت تتعظ
الثلاثاء، 6 ديسمبر 2011
ســــلام للـــي
للي ثاروا عـ النظام
واللي قالوا خلاص حرام
واللي باتوا فـ الخيام
مصر بعتالكم سلام
---------
للي ضحوا بنور عينيهم
واللي داس عسكر عليهم
واللي فـ الشده تلاقيهم
مصر بعتالكم سلام
---------
للي واجهوا رصاص نحاس
واللي نادوا مصاب يا ناس
واللي ثاروا مـ الأساس
مصر بعتالكم سلام
---------
للي واجهوا طلقة الخرطوش
واللي عادوا الظلم وكشفوا الوشوش
واللي نزولوا الميدان ولا رجعوش
مصر بعتالكم سلام
---------
للي إتصاب والحجر ف إيده
واللي إتسحل من عبد نظام وهوا سيده
واللي نكد علي شرطي مجرم ف يوم عيده
مصر بعتالكم سلام
---------
للي نصب للخياله وخيلهم كمين
واللي قال للجمل إبرك قاله آمين
واللي خلي الزمن واقف يشاهده سنين
مصر بعتالكم سلام
---------
للي إنضرب رصاصه ف دماغه
وبعد ما مات قام للي ضرب جاب داغه
واللي بدمه كتب كتاب حريته وصاغه
مصر بعتالكم سلام
---------
للي نصبوا في عز البرد عالأسفلت خيمه
واللي ناموا ف الطل يتغطوا بأي غيمه
واللي أهدافهم لسه واضحه ومستقيمه
مصر بعتالكم سلام
---------
للي صلوا قدام العساكر صلاة العصر
واللي إنداسوا علي الكوبري وعصروا قلوبهم عصر
واللي عددهم ما كان له حصر
مصر بعتالكم سلام
---------
للي صاموا وقت ما كان الفطار
واللي حولوا إنهزامهم لإنتصار
واللي عاشوا ف الميدان وقت الحصار
مصر بعتالكم سلام
---------
للي راحوا هناك لجل ما يشيلوا الوزارة
واللي هدوا السور قدام العماره
واللي نسفوا خط غاز بايعينه بخساره
مصر بعتالكم سلام
---------
للي نزلوا عشان الإعتصام
واللي قالوا كفاية يا عسكر حرام
واللي جوه الميدان حافظوا ع النظام
مصر بعتالكم سلام
---------
للي صبروا علي تشويه الكلام
واللي قالوا عنهم شوية لئام
واللي وصفوهم بأوصاف سخام
مصر بعتالكم سلام
---------
للي وقفوا تحت شمس زادت من سمارهم
واللي علوا هتاف وطالبوا بثارهم
واللي لجل الثورة فاتوا ديارهم
مصر بعتالكم سلام
---------
للي فرضوا إراده علي نظام واعوانه
واللي ضموا شهيد جوه أكفانه
واللي صلوا عليه وهوا ف مكانه
مصر بعتالكم سلام
---------
للي ثاروا وحققوا وجودهم
واللي جه الأمن يكسرهم نشفوا عودهم
واللي ندروا مصر تتحرر ووفوا بوعودهم
مصر بعتالكم سلام
---------
للي فتحوا ورود ف جناين الأسفلت
واللي نعشهم من اللي شايلينه يفلت فلت
واللي كتبوا بدماهم حايمشي قبل يوم السبت
مصر بعتالكم سلام
---------
للي سال علي وشوشهم خيوط الدم
واللي فضلوا ينزفوا والجرح لسه ما لم
واللي إتصاب قالوا له إرجع رد أرجع مين يا عم
مصر بعتالكم سلام
---------
للي دبوا علي أرض الميدان برجليهم دب
واللي قالولهم الحياه حلوة قالوا الشهادة أحب
واللي صبوا دماهم فدا حرية وطن صب
مصر بعتالكم سلام
---------
. . . . ولسه مصر بتبعت سلام . . . .
الاشتراك في:
الرسائل (Atom)
