رســـــالة
للي ثاروا عـالنظام
واللي قالوا خلاص حرام
واللي باتوا فالخيام
مصر بعتالكم
سلام
للي باتوا الليل حفايا
ف الطل من غير شكايه
فاهمين اصل الحكايه
التاريخ عمال بيكتب عنهم
أروع كلام
واللي سار بقلب جامد
يقتلوه يقوم ... يعاند
يسحلوه يقول بأجاهد
له فضل ما ينكره
إلا خسيس وجاحد
اللي ماتوا بالرصاص
واللي نادي بالقصاص
واللي دمه لجسمه عاص
دول نزلوا عشان قضية
مش هوجة وخلاص
أما اللي ضربوا علينا نار
وقتلوا أهالي الصغار
وحرموا عيون ضي النهار
التاريخ كاتب إسمهم
مغول ... تتار
واللي إدوا ليهم أوامر
واللي عاش لرقابنا ناحر
واللي كان بكلامه ساخر
انقلب مجرم ف قفصه
حاطط صباعه ف المناخر
ودولا طلعوا يقولوا بابا
ودولا زفوه بالربابه
ودولا عسكر عاملين طيابه
وهوا عويل كان إفتراه
علي الغلابه
يا مصر شعبك الأصل طبعه
والكرامه مغرقاه من راسه لحد صبعه
والرجولة فيه أهله وربعه
فيه صحيح أشباه رجال
لكنهم ذره تراب ف صافي نبعه
بكرة يا مصر تشوفي الرجال
شايلين علي ظهورهم آمال
وف كفهم حجر بناء وحجر قتال
لا همهم قمع النظام
ولا هما حبه عيال
