حبة رغي

أعذورني
عدت تاني
من جديد
جاي أرغي ومن كلامي
يسيح حديد


كلنا شايفين بلاوي
في قدسنا
كل يوم عن يوم تزيد
واللي ساكت
واللي صهين
واللي قال إحنا
عبيد

واللي حاكم
واللي شاكم
واللي كاتم
واللي طاطا
والبطاطا
نظرهم دايماً بعيد

ولسان كلامهم
ليه نحارب
اللي راكب
وليه نوقف
جمع الزكايب
وليه نطور
اللي خايب

عبيدنا
حالنا
يبقي افضل
لو هما فضلوا
حمير

واللي ينهق
وجعيره يهتف
عاش الملك
عاش الأمير
نكرمه بوشاح
بمبي مسخسخ
ويبقي مقامه عندنا
البيه خبير

نيجي بقي للسياسة الخارجية
لاه قصدي
الشرق أوسطية
يوووه أنا أقصد
السياسة اللوزعية
اللي هيا

باب يجيلك منه ريح
سده يا عبده واستريح
واللي يمشي جنب الحيطان
يبقي ضله لم يبان

واللي يقتل من عبيدي
أروح أقوله فيه كمان

واللي يمنع ستر المفاتن
علي ايه نداري حسن الحسان

واللي يقاوم عدوه
يبقي خايب جبان

واللي بيصون الكرامة
تاجر جبان لوطنه خان

ماهي السياسة اللوزعية
من اختراع الامريكان

عجبك يا فندي الرغي ده
ماكنت ساكت
وف نفسي كابت
وفكري ثابت
ومفاصلي سابت

لكن عقيدتي
دايماً أبداً
حجر صوان

دبوس مشبك 13

خبر في (سرتك) الدلعادي (قمة) الخيابة قراراتها مش حاتبقي أقل من (صرمه) مع أن أصحاب النيافة والأيافة والفخامة والرخامة جاتهم ( خيمة ) إتجمعوا فيها

ستيتوساية علي جنب

لما النهار إسود قالوا دي عتمه ... ولما الفرح سكت قالوا العروسة هتمه ... ولما رجع كما القرش ماسح ... قلت يا رب إجعله من أعماله فينا خاتمه

فسفوسه عن أمي

طلبتوا نكتبلها كلمه
نقول إيه عن النسمه؟

عجز الكلام وإتلجم
ماهو
وصفها مش فـ جرة قلم

أمي يا ساده مش أي أم
أمي صاحب وقت الشده يضم
أمي دوا وقت الجروح بيلم
أمي بنا لو فيه شروخ بيرُم
ولما نلعب بصره عمرها ما بتخم
أمي عمرها ما كانت مجرد أم

أمي هيا سندي في الحياه
رضاها وحبها هدفي ومبتغاه
لو زعلتها بجداره أنول غضب الإله
أمي لو تعبت ما يطلعش منها الآه
واللي يتعب مننا تجري تجيب له دواه

أمي الكلام عنها ما يخلصش
واللي يقرا ممكن يقول بلا نتش
هوا فيه في الدنيا كدا أمهات يا كوتش
أقول الدنيا مليانه ملايكة لاهو أنتا مادريتش؟

دعوة يوم الجمعة

أنا جاي ادعيلكم يوم الجمعة
قولوا آمين
ربي يعظم كل اجوركم
بالملايين
ربي يغفر تل خطايا زي
الطين
ربي يهدي كل مقصر بقاله
سنين
ربي يحنن كل قلوبكم علي
المساكين
ربي يفرح قلب المكروب واللي
حزين
ربي يرضي عنكوا الاهل و
الوالدين
ربي يرزق وحيد بوحيدة ويبقوا
إتنين
ربي يكرم كل مذاكر ونشوف اسمه من
الناجحين
ربي يشفي كل مريض صحة فـ بدنه ليوم
الدين
كل ما أقول كفايه عليهم عقلي يقولي أوف عليك
لأ أوفين
وادعي احيراً ربي يسهل ليا الحال واقدر أشطب
المواعين
أنا قلت ادعيلكوا مانتوا حبايبي قولوا ورايا يلا
آميييين

تعرفي ؟

تعرفي؟
انا كنت شاكك اني
عمري بينسرق مني
وانتي اكدتي الظنون

مره تيجي تقولي يللا
ومره تقولي علي الله
دي حياه صابها الجنون

لو العناد في أصل طبعك
والجفا صابب في نبعك
كل شيء ممكن يكون

كده وصلنا لآخر الطريق
جوة حلقي ما عادش ريق
بعد الفراق كله يهون

بصي يا بنت الحلال
لانا وجيه ولا عندي مال
بس قلبي لم يخون

الف واحد غيري رايدك
وأنا شفت نصيبي بعدك
كل واحد للحياه لازم يصون

تعرفي؟
شكي كان في محله
والبعاد كان هوا حله
تشربي حبة لمون؟

برنامج رئيس - هلوسة انتخابية

لطالما راودتني فكرة

ما حدش عاجبه عم الحج اللي متسلطن علي انفاس الخلايق من ايام شم النسيم
طيب لو جت لي جموع الشعب وجحافل المواطنين ووقفوا قدام بيتنا الايجار وهتفوا
بالروح بالدم . . . يروح في داهية الهم
بالروح بالدم . . . ماعادتش الدنيا تغم
.

.
ويطالبوني تبقي رئيس الجمهورية
بس المشكلة ان الجموع دي عاوزة برضو تسمع مني برنامج انتخابي
هوا الموضوع مش سلق بيض . . . ولا اييييه؟
خصوصاً لما تكون حاتقود شعب عالي الثقافة والادراك والحس زي الشعب اللي واقف تحت الشباك ده
.

.
وعليه قررت أن أشرع في طرح برنامجي الانتخابي
علي اساس ان الكام عضو اللي بيبصوا هنا دول يمثلوا طوائف متنوعة من الشعب المصري ويجمعهم مشترك واحد الا وهو ان كلهم صوابعهم علي علاقة وطيدة بالكيبورد

بسم الله نبدأ

-----------------------------

أيا شعبي الحبيب المهاود
لا كنت بطل ولا حتي مجاهد
لكني ف حالي وعالنت قاعد
وإطمنوا مش حابقي جاحد

جايلي ف ورقة سؤال انفعالي
حاتسرق وتنهب ونفضل نلالي
ونقول فين ناصر و بوزيد الهلالي
يرد العساكر ياحبيبي تعالالي

وردي عليك
لمن يكون حرامي دون
يتحاكم وتنقطع إيد الزبون
يبقي اللي يسرق او يخون
حقه عقاب إشي مين يكون
وحاتشوفه بعنيك

كمان رساله فيها كلام اخر رزاله
حاتعمل إيه ف الفقر؟ دا إستحاله
واللي عاطل ومش لاقي قوت عياله
واللي عايش يوم بيومه ومحد سابه ف حاله

وردي عليك
لما نعمل حد ادني للرواتب للجميع
ولما ف كل حاره نبني مصنع مش نبيع
والاشيه معدن وكله يبقي عنده ريع
يعني حانقضي ع الفقر بإجراء سريع
وبرضو حاتشوفه بعينيك

طب شوفوا سؤال اخر سلاسه
هوا إنتا أصلاً ليك في السياسه
شكلك شوال والحكم محتاج كياسه
لو لليهود تعارض يبقي يومك اخر تعاسه

وردي عليك
أنا وإنتا وكل واحد في البلد لينا فيها
والسياسة الخارجية لازم كلنا نبصم عليها
والكرامة أهم منتج للشعوب صنعة إيديها
وإن مصري يوم إتهان حنقلب عاليها واطيها
ودا حاتشوفه بعينيك

وآدي مريض بيسأل عن العلاج والدوا
لو جه وباء فيه علاج؟ ولا نندفن سوا؟
والكيماوي والغسيل حق وحقيق ولا هوا؟
والقسطرة والكبدي سي المريض منها استوا

وردي عليك
يا والدي آآآه حرام وجعت قلبي من الألم
العلاج للي قادر بالفلوس حق ما طاب واتخدم
أما الفقير حقه علاج من غير فاتورة بيها ينصدم
والمستشفيات لازم تليق وشفا المريض هوا الأهم
ولازم تشوف ده بعينيك


وادي ورقة من واحد مسمي نفسه فات المعاد
حتعمل ايه يا ريس إنتا في المحسوبيه والفساد
ف كل دايرة وكل مكتب مرتشي والغش زاد
والضماير في الجمارك أعلنوا عليها الحداد

وردي عليك
الفساد في كل حته بس قطعه مش محال
واللي عاش ف وسط شعبه شافه علي كل حال
ولما يكون فيه رقابة مش حايبقي في احتيال
ولما الفاسد ياخد عقابله الباقي حايعيش حلال
وحاتشوفه بعينيك

بص يا شعبي الحبيب الصبور
كل واحد فيكم عالظلم لازم يثور
البلد فيها 80 مليون جسور
وأي حد عـ الكرسي إما يخدم بذمة
يا بإرادة الشغب لازم يغور

وربنا يستر
:))

دبوس مشبك 12

معادلات عباسية:-


تهويد الحرم الإبراهيمي ومسجد بلال بن رباح + إستيطان + إغتيال قيادات حماس = قبول مفاوضات غير مباشرة برعاية وسيط غير نزيه


تهويد المسجد الأقصي وقبة الصخرة + استكمال بناء الجدار العازل + طرد الفلسطينيين من القدس والبلدات العربية + القضاء علي فرص حماس في الفوز في اي انتخابات قادمة = مفاوضات مباشرة وتسليم أراضي فلسطين بالمجان للصهانية





والشيء لزوم الشيء

ألا تستحوا؟

يا من جمعتم شتاتكم بإسم العرب
ألا تستحوا؟
يا من وحدتم ذلكم وقاتلتم فينا الغضب
ألا تستحوا؟
يا من جبلتم علي النكوص إذا جللٌ خطب
ألا تستحوا؟

في قمم الخضوع أعلنتم للسلام مبادره
ألا تستحوا؟
رد العدو تهكماً ولازال منكم رغم هذا مثابره
ألا تستحوا؟
فرح العدو بمنكر فعالكم فلا حاجة لمناوره
ألا تستحوا؟
كلما زاد قي طغيانه زاد ولاؤكم ما أحقره
ألا تستحوا؟

هودوا حرم الخليل ولـ بلال مسجداً سفهوا
ألا تستحوا؟
حملتم سفاحاً قبول تفاوض وفترة ليمرحوا
ألا تستحوا؟
إلي متي يا عار علي جبين امتنا سترزحوا؟
ألا تستحوا؟
كثر هم من كرهوا فواح ذلكم فلا تفرحوا
ألا تستحوا؟
سندوس علي أشلائكم سمحتم أم لم تسمحوا
ألا تستحوا؟

هان الهوان علي من هان من أمثالكم
فأمثالكم لا يستحوا

ملحمة ... حبيبي يا فرود

حبيبي يا فرود يا لعيب
أنا أخسر لو عني تغيب
ولا يمكن أهدافي تصيب
ولا فـ فوز يكونلي نصيب
يرضيك أنا أخسر يا رهيب؟
صدقني دا بعدك كدا عيب؟

دا أنا وإنتا دويتو حكايه
أهدافنا واحدة ... ونونايه
لو تزعل ألاقيك متقمص
وجاري واخد ركناية

با سلام يا حبيبي علي جمالك
وقت ما بتغزل يا دلالك
ولا الترقيص ..آآآآه يحلالك
والجون بتسجل بشمالك

يا حبيبي كفاية فاولات
ودرمغة وعياط وآآآهات
وخناق علي إنذارات
قصره ... بلاش حركات

إحنا الاتنين في فريق
ليه تسلل وليه خوازيق؟
يا نلعب سوا بالزوق
يا الكل يبات مخنوق

الفكرة ف لعيب بيلاغي
عصافير في السما بتناغي
تباصيلي اشوط بالرجل
ترفعلي اشوط بدماغي

في اللعب مافيش حوارات
علي طول أديكي ثروهات
أباصيلك نني عينيا
من قبل قولة هات

فريق ومصيرنا واحد
حياتنا زي المباراه
يا نلعب والكل يساعد
يا الواحد يعض قفاه

فاكره؟؟

فاكرة ؟
سنين كتير عدت علينا سوا
كان فيها قليل سم والباقي دوا
أغلبها كان بلح وقليل كان النوي
فاكرة أيام الحب والغرام والهوا ؟
نسينا ليه كل دا وأصبح لقانا جفا
ولما ننام نصدر لبعض القفا
راح فين الحب؟ حقيقي إختفي ؟

فاكره
فاكره لما جيت لحد شغلك بالفطار؟
فاكره تحت بيتك أد إيه طال الإنتظار؟
فاكره في رمضان ساعه الفطار؟
فاكره أحلامنا الصغار؟

فاكرة الجد واوقات الهزار؟
فاكره لحظات الزعل والاعتذار؟
فاكرة نظرات العيون لينا بانبهار؟
فاكرة قلبي اللي كان نبضه
لحن إسمك ليل نهار
فاكرة . . . حياتنا بإختصار؟

صحيح كان فيها بعض الهزايم
بس كان فيها كتير انتصار
كان بينا حب ومودة مهما كان المسار
كتير زعلت لكن بارجع باقل اعتذار
وكتير زعلتك وارجع أقول أصلي حمار
واستعيذ بالله ألاقي الشيطان من وشي غار
وأرجع أشوفك قمر طالع في عز النهار

فاكره لما عورت صبعي وانا باعمل لك هديه؟
فاكره تضميدك لجرحي وانتي قلقانه عليه؟
فاكره كلمة ليه يا روحي تعمل العمله ديه؟
هديه ايه وعيد ميلاد إنتا عندي أغلي ما ليه
فاكره سهرك ليالي والمشاركة الوجدانيه

معقولة ناسية كل ده؟ طب فاكرة اسمي ايه؟

أنا عارف
طبعاً اكيد مش ناسية حاجة بس الزمن
صاب القلوب حبة صدا وراه الحب اندفن
محتاج مشاعر تطهره ويرجع صالح للسكن

والحب يرجع يعمره وأرجع ليكي نني عين
والحياه ترجع حلاوة والأمل يرجع يزين
بس المهم قلوبنا تصفي وتفكيرنا يبقي رزين
مش كل حاجة خطف رجل علي المآذين
الحياه مرح ويا حسره عاللي يموت حزين
السعادة فيها العمار أما التعاسة للهدامين

دنيا ليها العجب

هيا كدا ليها العجب
لا علي الغني جنه
وعـ الفقير ساءت الأدب
فيها الضرب تحت الحزام
وفيها المشاكل للركب
. . .
لكن ثواني معايا كدا
. . .
هيا اللي فيها كل الاحبه
وفيها كبرنا حبه حبه
هيا دنيا فيها الحياه
مش كلها سوده وكُبه