لن أعارض

لن أعارض بعد الان
ولن أعترض
ومهما هالني حال بلدتي
لن أمتعض
وإن أهلي ماتو جياعاً
لن أنتفض
وإن صُرٍع أفراد أسرتي
قتلاً خطأ سأفترض
فليحدث جلل في بلدتي
لن أعترض
حكومة بلدتي سخية شعارها
بالربا إقترض
وشعار أمن بلدتي إذا سرقت
من الغنيمة إستفض
أما جباية بلدتي فشعارها
بالله إستعض
أما ولي الأمر فما باله
اللهم لا أعترض
مارأيك يا قارئ
هل يستحق الأمر
ان أعارض؟
لا لن أعارض
وعلي البلاء
لن أعترض

خاينة

آآآآه منك يا خاينة
يا خالية من مواصفات الأمان
يا خاينة
ياللي قبلتك من غير ضمان
أنا اللي دخلتك في بيتي
وقلت أخيراً كله هان
أتاريكي مش أصيله
وفي ثواني كله بان
إتكتمتي!! وهديت نسايمك!!
حتي قلبك إستكان
ومن عمايلك
الجو أصبح نيران
دافع فيكي دم قلبي
حتي قالوا إستدان
ورغم إني عجبني شكلك
إلا إن الأصل خان
حاولت كتير ألبي مطالبك
وإنتي دلعك جابلي إحتقان

قراري نهائي
مش حاعيش تاني مهان
ولا حافضل إنسان جبان
معادش ليكي فـ حياتي مكان
حارميكي بره بيتي
وبكره أجيب
تكييف مأصل
إتنين حصان
يا مروحة
يااااا خاينة

هجاء في حق مروحة طلعت مش أصيلة ....

ابويا علمني

أبويا علمني
إنه من الشجاعة
لما اغلط
أعتذر
وعلمني
لو فكرت أسرق
أهون عليا
أنتحر
وقال لي يابني
لو حاربت
لازم تنتصر
ولو صابوك في مقتل
إتشاهد وانت
بتحتضر
أبويا علمني
اعيش شريف
ومن شقايا
أكل الرغيف
ومهما حصل
اعيش نضيف
وعلمني
إن الحق
بالاتباع احق
وإن الكدب
خراب علي روس الكدابين
دق
وعلمني كمان
إن الوطن إنسان
وحبه حق
مش صدقة واحسان
أبويا كان فلاح
زرع فينا القيم بكفاح
وسقي زرعه تقي وصلاح
وسهر وراعي مسا وصباح
احب أبعتلك يا بويا
رسالة ما حاتوصلش
ولدك علي دربك ما قصرش
ومهما طال البعاد
ننساك ما نقدرش

وحشتني يا والدي
الله يرحمك بتربيتك لنا

عجيبة يا بلد

عجيبة يا بلد
فوق القواعد للأبد
لا اللي فيكي دايب
ولا البعيد سايب
اللي قاعد مهوش حابب
واللي رحل بالدمع كاتب
صعبان بعادي عنها
اصلي عبيط بأحبها
وياما غتيت لحنها
واهلي هما اهلها
بلدي عزي عزها
لاااا مش قصدي عز
اللي استحلها
وبحديده هدها
واللي فيها ومنها
قاعد بيلعن ذلها
مغصوبة مسروق مهرها
مجروحة مقطوع كتفها
ومن الآهات
لما نطقت
نطقت سكات
ولما إتسأل فين ولدها
ردوا ... مات
ماهو جوه بلده
واكل فتات
والسن جاري
والقطر فات
كله يبرطم
ولو فيه زيادة
سمعني هات
كل اللي قلته
يمكن حقايق
لكن اللي جاي
محتاج لواحد
مصحصح وفايق
فصحصح معايا
وكفاية شكاية
وديل مدلدل
وفرش الملاية
بلدنا خيرها
وبرغم التهايب
كتير مرطرط
واللي يدور
حايلاقي شغلة
ويصبح مزأطط
حرب تفكر
جرب تقرر
جرب تنفذ
والفكرة تكبر
وتبقي حاجة
مش كلمة واحدة
من ضمن الدباجة
ولا نكتة بايخة
ضمن السماجة
خليك ضيا
من جوة عتمة
خليك نسمة
في ليله كاتمة
وياللي الغربة بتنهشك
و تراب بلدك بيوحشك
خليني اقولك وأنكشك
ابوس إيديك
وإيدين ابوك
واللي جابوك
لما ترجع لحضن وطنك
هاتلي معاك
أحسن سلوك
وهات معاك
حبك لاخوك
ولو مش حاتقل
تجيب لبلدك
دستور جديد
نلغي بيه
نظام الملوك

مقتل أنثي سبع البرمبه

يحكي أنه في سالف الأزمان
كان هناك قرية تسمي تواهان
أهل القرية رعاه واغنامهم قطعان


وكبير القرية السيد سبع البرمبه
وانثاه كانت تدعي الست كبه
كانا يسكنان في منزل تزينه قبه
تسمع صراخ الست يتخلله عشرون سبه
اما سبع البرمبه فلا جبل له ولا تبه
فهو مغوار علي اهل قريته وفي بيته
أداه تسليه كأنه لبه
وفي يوم ظلامه حالك نطق
إنتي طالق يا ست كبه
كشرت الست عن انيابها كأنها دبه
وتراجعت خطوات حتي تهب عليه هبه
فاذا بها تسقط من عال وتدب الارض دبه
ماتت عجوز البيت وكتب علي قبرها
ماتت أنثي سبعكم وهي شابه

----------------------
اياكم حد يسألني ايه اللي مكتوب ده

مححححكمه

مححححححكمه .. الكل إنتفض
قاضي دخل .. الهمس إنخفض
وقف الوكيل
قدم دليل
إن القتيل
هوا السبب
وإن اللي قاتل
ولو إنه سافل
إلا إنه للوفاه
ماهوش سبب
واللي اجرم
وقتل وتجرم
لفة مخدر
بلعها مجرم

اما الامين ويا الرقيب
التهمة فالصو
ماهي الامانة
دي شيء يعيب
أما الرقابة
سيِب وسييب

ياخوانا برضو والله عيب
مزودينها زيادة خالص
ايه يعني لما المظبوطات
تصبح نواقص
مش الحشيش دخل القضية؟
يبقي الفلوس بالقسمة تدخل
جيوب البلالص
واللي ينخور ورا الجاكومة
ما ينوبه منها إلا المناغص
ضرب واهانة
وناس تموت
بكل استهانة
وزور شهود
وتلفيق تهم
لأبعد حدود
وناس تروح
ولا يوم تعود

عندي سؤال
هيا الحكاية عند وخلاص؟
فيها يعني ايه
لو اللي قتل بالعدل
يتحكم عليه؟

لو دا حصل يبقي تمام
وان لم حصل
يبقي يا دنيا
علي العدل السلام