حدش شاف مصر؟

حدش شاف مصر يا خونا؟
دي صورتها وهيا صبيه
من حسنها سميناها بهيه
عجزت بس فيها من الملامح ديه
حدش شافها بتسأل عنا؟

حدش شاف مصر يا خونا؟
كانت لابسه توب اخضر زرعي
شالها أزرق نيلي عـ الكتاف مرعي
دلوقتي لبسها إترقع باسود وبتي وقرعي
حدش شافها بتسأل عنا ؟

حدش شاف مصر ياخونا؟
كانت وسط اخواتها بكريه
يجروا لحضنها تضمهم بحنيه
بعد المرض صبحت عاجزة وهفيه
حدش شافها بتسأل عنا؟

حدش شاف مصر ياخونا؟
دوروا معايا دي مصرنا فـ محنه
خاطفها عز والشله والطحنه
ايدك فـ ايدي نغير السحنه
ونرجع مصرنا لنا إحنا

كداب في اصل وشك

كداب ياللي تقول بأحبها
وماشي توسخ أرضها
وتحرق قش رزك في جوها
ويسألوك تقول دانا إبنها
كداب في أصل وشك

كداب والكدب عليك باين
أصل الي زيك بطبعه خاين
لا بيت ولا غيط ولا طريق صاين
واللي يقول غير كدا غشك

حافظ علي بلدك ودا واجب
دي أمانة وما تجوزش للخايب
حانحافظ عليها ولو كنت مش حابب
وإلا حاتلاقي واحد بمخالفة نشك

كداب ياللي تقول باحبها
وماشي توسخ أرضها
كداب في اصل وشك

مزاد

قررررب يا مواطن ... قرب يا عويل
اديني صوتك وخليك ذليل
وخدلك ورقة بميه علي جتتك حار وويل
اديني صوتك علشان اسرقك
وفي سوق الرقيق اسوقك
وبزرع مسرطن اشبرقك
صدقني انا غرضي شريف
عاوزك تعيش جيبك نضيف
هدومك ما فيش ماهو كله صيف
واعيش انا اخر حصانه
أوافق علي اي قرار بكل رصانه
واركب عيالي علي كتاف عيالك
ماهي حضانه
بص يا مصري يا غالي عليا
نديني صوتك تديه لغيري اهو برضو ليا
ناجح وغضب عن عين جنابك المستحيه
واول قرار اقلب يا مصري خروف بليه