مصر الموكوسه

يا مصر موكوسة بكترة السلاطين ... من أول برقوق للـباقيين ... قتلوا بعضهم ع السلطنة ... ولا همهم شعب موكوس بيهم إسمه مصريين

العبد

مستخلص نبات الصبر دايماً طعمه مر ... والعبد طول ماهو اسير يتمني يبقي حر ... ولو صادف ف يوم وإتعتق ... يدور علي سيد جديد قبل ما اليوم يمر

الدنيا برضو

الدنيا ماشية بالمقلوب ... تديها حب تزأل طوب ... تبكس تشلت ... تحت الرجل تصير مركوب

الدنيا

الدنيا مخلوقة عشان تتعاش ... ماشية في طريقها متستناش ... يا تركب فيها يومين ... يا تفوتك وما تعشهاش

مالوش لازمة الكلام

كلامي لا يجيب ولا يودي ... يدخل من الودن ومن التانية يعدي ... عقلي علي قده وعاجبني ... شايفني في المراية عبقري ومين قدي

حكمة مهلوس

لما الحياه تفضي نقطة نقطة ... وجراب الزمن يحوي فراغ ... يبقي الموت بضاعة لقطة ... والفنا شيء مستساغ

سنارة صيد

لما أطعم كل يوم وأرمي جامد ف الغويط ... تغمز السنارة ألمها حبة حبة آل إيه حويط ... تطلع السنارة فيها وهم علي حبة خيابة ... شافني خبير قاللي طعم عدل شكلك عبيط

إزهق

إزهق وزهق في الخلايق ... النكد عليك شكله لايق ... ومين فينا مش بؤجة هموم ... إتلم وبلاش أفتح لك باقي الحقايق

الفلنه

لما واحد يجي جنبك يمسح دموعك بالفلنه ... تلاقي دمعة تجري فاره واللي عمله ولا كأنه ... أصل الريحة صعبة خالص ... زي أي حاجة تيجي منه

رضا

فاكرة الوفاء ويا المحبة والحنان؟ ... فاكرة الحاجات العاقلة والجنان؟ ... لما كان اللي بيننا شيء كبير ... كان فيه رضا رغم غياب الأمان

فرق

الفرق بين حبي وحب غيري كبير ... الحب عندي بيبقي واضح كل شهيق / زفير ... الحب مش مجرد كلمة بترعش قلوب ... لكنه عندي جنون من النوع الخطير

عارفة ؟

عارفة ليه فيه حاجات مبنفهمهاش؟... حاجات بتموت وغيرها عاش؟... عشان كتير من الظروف مش صنعنا ... وكتير بنوعد بكرة يجي نلاقيه مجاش

الطهارة

الطهارة مش بس محصورة في الوضوء ... الطهارة قلب أبيض بيشع ضوء ... خاشع أوي وقت الخشوع ... ولو الحق إنجرح ينسي كلمه هدوء

مافيش

وأنا اللي بأقول علي الوحشين مايلزمونيش ... والحلوين لو يتعوجوا مايعجبونيش ... ماسك غربال وبأغربل البشر ... لقيت في الأخر اللي فضلي مافيش

جبل

لو جبل أنا كان زمانه إتهد ... قايم ونايم في الشقي والكد ... ولسه فاضل من المآسي وتر ... ويبقي باب الفرح بالضبة والمفتاح إتسد

النقاشين الجدد

 ياللي بتدهن كل شخص بلون
دا أبيض ودا إسود
ودا رمادي دون
دا ثورجي مولتوفانجي
ودا جوة البيوت مكفون
دا لون اللهب قلبه زي الحجر
...ودا زي الجيلي علي كل لون
جناب النقاش البرمجي
حضرتك للأسف معفون
ملطشة
بكل البويات مدهون
شكلك نتن أوي
وف عرف البلد تنتون

وجعي

يا وجعي من الأيام وعمايلها ... نهارها سواد والسهاد ليلها ... ليها في قلبي ألفين علامة أسي ... بس الأكادة هيا ناويالي وأنا برضو .. ناويلها

محسود

أنا المحسود علي قلة الأبخات ... البسمة علي وشي وجوة آهات ... بأضحك وضحكتي جلجلة ... وجوة القلب وجعي سكات

شقايق

الدنيا فيها العدل شقيقه الخير ... خل وخليله مالهمش لبعض غير ... لا يوم تشوف الخير ف دنيا من غير عدل ... ولا عمر كان فيه عدل ف دنيا مافيهاش خير

عوام

عوام وأغرق في شبرين غرام ... غاوي أطير مع الأحلام ... ولما أفوق من غفوتي ... أشد الغطا كويس وأنام

غراب البين

تشهد عليكي رموش العين ... وحمرة خجل علي الخدين ... ونظرة حيا مع سيرة الفرح ... وماعكر القعدة إلا ( القايمة ) قالها غراب البين

النهارده

النهارده آخر نفس في الجوف ... ملعون أبوها عيشة الخوف ... لو ماكنتش قدها سيبها ... للي يعيش مربيلها رعب صنوف

مجرد دعاء

 يا رب الداخلية بنت الكلب تسحل العيال ولاد الكلب اللي بيخربوا في بلدي اللي فيها نظام إبن كلب ومعارضة بنت ستين كلب

دنيا

دنيا حلوها مر ... ولا فيها حاجة تسر ... بنخدع نفسنا بحاجات ... أكترها فايده يضر

الظروف

هوا ليه كل الظروف بقت شبيهة ... يعني بكرة زي النهارده أيام حزني ماليها ... نفسي أفتكر ولو فرحة واحدة ... ولما مرة أفتكرت إبتسامه قمت من نومي ناسيها

إستباق

كنت دايماً بأستبق بعض الحاجات ... فلان حايبقي جدع وفلان بكره مات ... لكن حياتي اللي راسها علي كعبها ... لا أنا عارف اللي منها راح ولا عارف اللي آت

ولادة إبن مصر

يا مصر ولدك إتولد
بعد حمل وصبر وجلد
ومخاض عسير
فيه الكل إتحد
وبدت بشاير الولد

ولدك قام فيها يحرر
اللي حاكمها رفض
قتل .. سحل .. مشهد أصبح مكرر
ولدك كمان رفض
... كسر خوفه ولـ ربنا كبر
هب .. قام .. كسر الصفد
وأروع ملاحم خاض وسطر

ماهو يا مصر ولدك ماهوش عاطل
واللي علي حق
ماهوش علي باطل
حالف لياخد حقه
من اللي بيماطل

لما الفساد اتغلغل وغل
وكس البلد ومافيش حل
والشعب زهد الحياه ومل
والعيشة صعبت وبقت خل

طلع الشباب .. أجدع شباب
من البيوت والكل فتح الباب
وقالوا للعالم الحر زرعه طاب
واللي ما يقطفش ذل وخاب

مشيوا في شوارع ملوها حريه
رفعوا روسهم مصري ومصريه

حرر ميدان من الطغيان
قام كل شبر فيكي ينادي
عشتي حره يا بلادي
عشتي حره يا بلادي

سؤال للظابط

حابب أسأل الظابط والصف ظبوط
كان مخابرات حربيه أو بكاب أحمر علي القفا محطوط
عملت إيه بالظبطيه يا عنيا؟
بعد ما كنت ظابط الشعب حايخليك مظبوط

قولوا لأمي

قولوا لأمي إشكريلي أهلي وناسي ... قوليلهم إبني اللي مات علشان تعيشوا مهوش ناسي ... إنه ضحي بزهرة شبابه مش بلاش ... لكن عشان تلاقوا حياه تتعاش

فلول

يا شعب مصر ياللي إديت الفلول بالكف
الفل منهم لسعته عالقفا م الكفوف ألف
واقصد بالفلول الفاسدين من نظام مقبور
مش اللي الإعلام والعكش عليهم لف

كرباجي

كرباجي علي ظهر العدا حامي ... للأرض والعرض أنا حامي ... ولو خان العهد خسيس أو ألف ... باقي أنا وحدي للعهود حامي

دفتر الأحوال

دورت علي بلدي في دفتر الأحوال ... قالوا مخطوفة ورجوعها تاني محال ... لمحت ف عنيهم كدب وملاوعة ... شخبطت في الدفتر بلدي حاحررها كفياكم إستهبال

بايع ضميرك

ياللي بايع ضميرك إنتا عبد من العبيد
منتاش واحد من العباد
اللي يركع للي فاسد
ويبيع وطنه ف المزاد
يبقي كيس مليان وساخة
علي كومة زباله زاد

يا مصري ياللي مسحول الكرامة
فز قوم حس برجولتك
قبل ما تقوم القيامة
... إما تختار اللي منك
أو تفضل للرمامة
حدد يلا مصيرك
قبل ما تيجي الندامة
لسه بلدك بنت صوتك
عطشانه ترويها ب علامة
إما صح عاللي نفخك
أو تعلم لجل نوصل بالسلامة

الإتنين مش خيارك أيوه فاهم
الإتنين مش عاوزهم برضو عارف
لكن الحق أقولك وإنتا راقم
مرسي مش شيطان
أما شفيق فالأبالسه جنبه نواعم
شارك بصوتك وإرضي ضميرك
وخليك لحريتك داعم

الأندال

إنحنائي ولو للحظة يسعد الأندال ... منحه ما يستحقوها علي اي حال ... إنحنائي لو تدقق زي القوس ... قوته في إنحنائه وإسأل سهامي ف الموال

صياد

طعمت قلبي ورميت سنارتي في بحر الهوي ... غمزت وإرتعشت السناره في الهوا ... سحبتها متمني حورية ف خيالي ... طلع القلب مجروح وبملح الوهم إكتوي

الله يرحمه

مات الكلام وإندفن جوه الشفايف ... والإبتسام صبح دليل عاللي خايف ... إوعاك تصدق بوادر فرح وسط الهموم ... مهو كل مرة يطلع سراب وآديك شايف

والعياذ بالله ( شعبولا ) ستايل

أنا بأكره عمرو موسي
وبأكره إسرائيل
ماهو واطي زيهم
وفيه مليون دليل

إيييييييييه ... إيييييييييه
...
انا بأكره عمرو موسي
بأقولها لو أتسأل
وكمان بأكره شفيق
اللي قتل وإتقتل

إيييييييييه ... إيييييييييه

أنا بأكره الفلول
ومجلس العساكر
وكل اللي معاهم
واللي شايف وناكر

إييييييييه ... إييييييييه

البلد دي حتنضف
وحق الشهيد يعود
واللي سرقوا ونهبوا
بكرة ياكلهم دود

إييييييييه .... إيييييييييه
إييييييييه .... إيييييييييه

مات الكلام

مات الكلام وإندفن جوه الشفايف ... والإبتسام صبح دليل عاللي خايف ... إوعاك تصدق بوادر فرح وسط الهموم ... مهو كل مرة يطلع سراب وآديك شايف

للي

للي خان بلده وناسي ... وداس بظلمه رقاب ناسي ... ومترشح علينا وعامل ناسي ... اللي زيك ملوش غير مداسي ... سوا كان خنيق أو دبلوماسي

رحايه

يا مصر يا رحايه ودايرة علي الكل ... فيكي اللي إتهرس بكرامه وفيه اللي عايش سليم بالذل ... الرحايه مش هيا اللي بتنقي ... أصل الكريم دخلها أما الذليل واقف بعيد بيطل

مخلب الدنيا

يا مخلب الدنيا مغروس في فلبي ... الجرح نازف ولا فيه طبيب جنبي ... ماهي جروح الأحبه مالها دوا ... تنزف بحور واللي جرح منها يعبي

الغربة

ناس كتير فاهمه الغربة سفر ... البعد والمسافات تعبير مختصر ... لكني شايف الغربة جوة الوطن واقع ... لما تحس إنك وحيد وسط البشر

دامت لمين؟؟

ياللي متبت فيها
دامت لمين؟
لا السلطة دايمه
... ولا البشر دايمين
أصل الحياه فنا
حقيقه ف كل دين
أصل الحياه رحله
والبشر عابرين
غيرك لو دام للكرسي
ما كنت تقعد عليه لو بعد ألف سنين
ياللي متبت فيها
أعمل لآخرتها
والجري ورا كرسي
فيه خراب بيتها
غيرك جري جريها
وآدي آخرتها
ضرب البلغ طاله
وخرجت عليه البشريه بعزتها
إرحل ...
كلمة قالتها الناس ما تنتها

أي كلام برضو

آه يا دنيا يا معانده فيا ... فيكي مشاعر الفرح والحزن هيا هيا ... مش لما نحزن أو بنفرح دموعنا بتنزل ... الدمعة دي زي الدمعه ديا

أي كلام وخلاص

تكمل طريقك لوحدك وارد طبيعي ... لا كل أيامك خريف ولا كلها مرت ربيعي ... ماهي فصول العمر آخر عجب ... وأعجب ما فيها ناس صنعتها بيعي