أحلام مصطنعة

حلم
----

في ليلة من الليالي أكلت فتة ونمت
يادوب غفلت عيوني قمت أنا سهمت
شفتني من إيدي مربوط وكمان إتكممت
أقول كلام كتير وأسمع ألاقيني ما اتكلمت

حوليا شفت شخوص ملامحها مش واضحة
بس اللي كان واضح روايحهم الفايحة
رحية شرور ونفاق وأذية للعين واضحة
ضربوني عكموني وفـ راسي عملولي بطحة

قلت بسكوتي ياعالم ليه الاذي والذل
ليه اللي يحكمنا لازم يدوس عالكل
أبدانا مليانه طاعون وسرطان وسل
وهوا يا عنيا سابغ ومكحل وزي فل

عاديك علي الرد تنكيل ورفس وشخط
اللي وقف علي بطني وهراها برجله نط
واللي علي قفايا كفه علملي ميت خط
ولا الكبير بتاعهم دولاب زي الشحط

قمت من نومي منفوض قلبي في ضلوعي
إتوضيت وصليت ودعيت ربي فـي ركوعي
يا رب سلم وامنع في الشر وقوعي
دمعت عيني يمكن خوف او من خشوعي