قوم يا مصري

قوم يا مصري
مصر بتدور عليك
بفكر عصري
خد إديدي فـ إيدك

قوم يا مصري
مصر بتدور عليك
إنفض تراب الركنه
وإشحن همم ساكنة
لمع تروس داكنة

وقول حـ أبني البلد
حجر من مليون إتولد
حديد مسلح كما الوتد
العدا من همتك يرتعد

قوم يا مصري
مصر بتدور عليك
مصر محتاجة ولادها
يبنوا فيها اللي إنهدم
صحيح حاكمها وأدها
ولا عمره حس بندم
لكن ولادها البكاري
حبهم ليها ما إنعدم
إن كان فيه حبة زعل
ياما جروج بتلتئم
ومهما كان دي أمنا
ولسه فيه برضو عشم

قوم يا مصري
مصر بتدور عليك
تقدر تغير
بس هات إيدي فـ إيديك
تقدر تعبر
ولو حتي بنظرة عينيك

قوم يا مصري
مصر بتدور عليك
لو مصر ضاعت مننا
إنسي رجوعها إليك
مصر طينها أصلنا
ونيلها دم بيجري فيك
ولسه بتفكر تقوم؟
مصر محتاجة رجال
مش تنابلة شبعوا نوم
قوم يللا خليك مفيد
وإلبس نضيف بعد الحموم
وإلا حاتفضل متنبل
وغير نفسك لا تلوم

آخر الحكاية
تيار فساد ولازم ضده نعوم
يا إما نوصل بيها للأمان ونهزمه
يا نشوف اللي ليها مقسوم

إنتفاضة بدن - لن ننسي شهداء الإنتفاضه

بداية الحكاية حجر
ونبلة من خشب الشجر

والتاني مقلاع كتان
يحول حجارته نيران

والثالث طفل انفطم
مسجون وليه سجان

واللي مالهم عدد انتفضوا
علي المحتل واللي خان

سلاحهم هوا الحجر
والشجاع بيبان
العدو رغم السلاح
خوفه عليه فتان
يقف الصبي ويقول له
بتهرب ليه يا جبان

شفت ولد منتفض
مش قابل الطعيان
بالايد دي يلقف حجر
وبالتانية يطلقه بنشان
ولو صوب عليه العدو
يختفي رهوان

ويرجع يعيد الكره
ويزأر ماني تعبان
لو خلص مني الحجر
أرمي عضامي كمان
كلي فدا وطني الأبي
منبت الشجعان

ويا سعده لما يصيب العدا
يبات الليل فرحان

بطلنا في مرة مـ المرات
ف رجله انصاب
حاصروه شوية جند
تشوفهم تقول حشرات
وقف البطل وسطهم
ومافيش كتير خيارات
ف ايده فضل الحجر

وبرغم الالم ماصدر منه اهات
بالعكس نطق الشهادة وابتسم
وهم برمي الحجر
ضربوا عليه رصاصات
وقع البطل مبتسم
تشوفه حي ما مات

سمعت منه كلام
بعد الممات بساعات

أبلغ كلام إتقال
لما سكت البدن
الأرض ارضي صرخه علت
لما البدن اندفن
ولا فيه صراخ وعويل
سارحة زعروته شجن
عمري ما حانسي البطل
مهما عدي زمن

ومهما طال الظلم
وإغتصاب الوطن
الشهيد دا أصله حي
موعود بجنة عدن

دكـ ..طورة

إلي الست الدكـ طورة اللي بتقول إن اسرائيل دولة عربية وان حدودها من النيل للفرات احب اقولك
إتخيبي إنتي والدكـ طور جوزك
ريحة رجل عيل بكافولة أطيب منكم
ودي هدية مني بالمناسبة المقرفة دي
-------------------------------------

إصطبحت بوش مين؟
بخبر زغلللي العينين

شوف معايا اللي حصل
واللي يمكن لسمعك وصل
أو سمعته من صاحبك لما اتصل

المهم

في جامعة من صروح العلم
حصل حاجة لنفسك لازم تغم

أصل فيه دكتورة خايخة
بتدرس للطلبة مادة بايخة

والكتاب مفروض عليهم
يشتروه مش بـ إيديهم

والغثاء اللي حاويه
مقرر عليهم يقروا فيه

برضو مش مهم

الولاد كبدي عليهم
بصوا ما صدقوا عنيهم

الخرايط فيها واضح
فلسطين مش عـ الخريطه
والمصيبة فعل فاضح
حاطين مكانها قرنبيطة
ومسمينها إسرائيل العربيه
جتكوا نيلة دكاترة عره
مش مستحية

لا ولما الطلبة نطقوا
وقالوا ايه ده
الست هانم بجحت
قالت هيا فرده
واللي راح يقول غيرده
راح يشوف في الشهادة
الكحكة أحلي ورده

قام العيال إشتكوها
وبالأدلة فضحوها
وعلي وعدها
سبعين في الميه
المادة شالوها

تهمد الدكـ طوره المفترية؟
ازاي تهمد و طوره هيه
راحت بخيبتها رفعت قضيه
علي بنت من التلامذة ضحيه
آل إيه بلاغ وكاذب شوف المفتريه

الست جوزها الدكـ طور
ف المنوفيه
هوا أس الجريمة
وأركانها مستوفيه

مخطط صهاينة لغسل
عقول الشباب
بيعة وشروه كتب وملازم
والعقل غاب
دكـ طوره تبيع وتشتري
في الطلاب
حتي الضماير عاوزينها
صمغ داب
فين الرقابة علي الكتب
ليه الرقيب غاب
فين وزير التعليم اللي عالي
ولا دا واحد وخاب
يا مصر فوقي وفوقي
ولدك من الهزل شاب
مين يقبل مصري يقول
إن الكلاب تصبح دياب
وإن الصهاينة العدو
أرضهم من النيل للفرات
ولا الهباب
هوا الطور ده ما علمش
انهم كانوا شتات
وكمان سراب؟

لو كان الوزير فيه الرمق
يصدر قرار بوقفهم ويتحمق

ويجروا يخبطوا علي كل باب
ويشوفوا رأي مصر فيهم
ويحسوا غضبتها عليهم
وبدل إبتسامة مصر ليهم
حايظهر لها ألف ناب

وجه الشبه بين الإنسان وشعرة الرأس

حيت انني لم اجرب قبلاً ان اكتب خاطرة
فارجو تقبل هذه المحاولة بصدر رحب

رأيت شبهاً بالغاً بين الانسان في محيط مجتمعه وشعرة في رأسي

شعرة لم تكن موجودة ولكنها بدأت تنمو واثناء نموها احتضنها الشعر المحيط بيها وظلل عليها وشاركته طعامه حتي تنمو وتكبر

هذا ما يحدث مع الطفل بمجرد وصوله الي عالم الواقع

تكبر الشعرة وتتعانق مع الشعر المحيط لتكون مجتمع الشعر المنتشر في محيط
الرأس

هذا ما يحدث مع الانسان عندما يكبر ويتعامل ويتداخل مع محيطه

تكبر الشعرة وتبدأ مرحلة الشخوخة وتبيض بعض الشعرات ويبقي بعض الشعيرات السوداء حولها تخفيها عن النظر اغلب الاخيان وترعاها

كذلك هو حال الانسان

يحين الاجل وتسقط الشعرة نعم تسقط عندها تبدأ شعرة جديدة في النمو

هذا هو حال الدنيا شخوص تفني وشخوص تولد

ولا ننسي تنوع الشعور منها المجعد صعب التصفيف
ومنها الناعم ومنها الخشن والسميك والرفيع

هذا هو حال البشر

في المرة القادمه عندما تقف امام المرآه لتصفيف شعرك
تذكر ان الانسان ماهو الا شعرة في قرعة الكرة الارضية

دبوس مشبك 11

في مصر فقط تلاقي اللي يقول علي الحرامي - اللي نعرفه أحسن من اللي ما نعرفوس - ويقولوا - دا سرق لما شبع اللي حايجي غيره حايبتدي يسرق من جديد - صدق اللي قال لك الله يا مصر يا وحدانية يا غلبانة

أنظمة العلاقة الزوجية 5

نظام
إخلعني شكراً
----------------

نظام مستحدث يتنافس فيه مقدموا الخدمة ويعتمد مستخدموا هذا النظام علي عدة مباديء اهمها

اللهم طولك يا روح
وأنا وانتي والزمن طويل
ومبدأ مش مطلق
واعي ما في خيلك اركبيه
واخيراً إبريني

عدة دراسات اكاديمية اجريت ما بين عامي 2004 و 2009 اثبتت ان معظم مستحدمي هذا النطام من ضعاف النفوس , قليلي النخوة , ماديين بصورة كبيرة
تفضل السيدات استخدام هذا النظام مع ما يلاقين من معاملة غير جيدة من الشريك داخل عش الزوجية مما يسفر عن استحالة استمرار الحياه

يعد النظام بديل آمن لنظام لاحق الا وهو كيسني شكراً

السيدات اللواتي يقبلن علي استخدام هذا النظام يبذلن في سبيله الغالي والنفيس ويتنازلن عن حقوقهن الشرعية في مقابل استخدام هذا النظام
ومن ثم الانتقال الي نظام إرتحت شكراً
90% من السيدات اللواتي اقدمن علي استخدام هذا النظام اعتمدن استراتيجية
يقطع الجواز وسنينه فور استمتاعهم بفوائد نظام إخلعني شكراً

تعزو دراسة لمنظمة زوجات بلا شنبات أن الغالبية العظمي من حالات استخدام هذا النظام تكون اضطرارية بسبب الزوج وسوء معاملته مما يضطر الزوجة الي اللجوء الي هذا النظام

وصدق اللي قال

بل خيشة ولا ضل راجل

بعد إذن إبني الموهوب بالفطرة - العنف في الشوارع - بداية حالة إبداع

العنف في الشوارع
-----------------------

خليك كول في اللذيذ
خليك مثال للشاب الـ بيس
كنت قاعد في رمسيس
كنت مستني اتوبيس

حصلت حاجة مش طبيعيه
لقيت كل الناس بيضربوا فيه
وبعدين رموني في العربيه

ودوني مكان غريب
قلت ابص جمبيه
لقيت ناس تانية
وست مفتريه

سألتها أنا فين
ردت عليا بكلمة غبيه
قالت لي انتا مالك بيه
قلت لها انا اسف
قالت لي ميه ميه

نادت علي رجاله
رموني في العربيه
بعدها روحت البيت
لقيت لقمه هنيه
قلت البلطجة
ما هيا الا بالنيه

وداع علي أمل اللقاء

رحلت الروح عن الجسد والدمع سابق
قالت آن أوان الرحيل والجمع لاحق
رجع الجسد مجرد بتاع ماهوش لايق
ماهو كان وجود الروح مخليه فايق
كتير التوائم تجتمع وتتخانق
وكتير أروح مع أجساد بتتعانق
وساعات روح بتفترق عن جسد
مع إن الجسد للروح عاشق
كل دا وارد حصوله في الحياه
وبرغم إن الدمع علي البؤبؤه زانق
بس العبارة
حبة أمل وسط الضلام شاقق
ربنا قادر يجمع الروح بالجسد
ويعود نهر الحياه رايق

---------------------

أسعدتوني بطلتكم السريعة يا ولاد
في أمان الله وحفظه

طال الإنتظار ... وأخيراً

من يوم ما وصل
وعن حلمه ما إنفصل
من يوم ما وصل
كان نفسه حلمه
يبقي حصل
لكن اللي حصل
الحلم بعد سنين ثلاثة وشويه
حصل
ولو إن الحلم للمدي ما وصل
أخيراً بعد طول الأمل
ولاده جايين ينوروا وحدته
أخيراً إحساسه راج يكتمل
برؤية نبض قلبه ومهجته
ولو إنها مجرد زيارة
لكنه بيها حـ يحتفل
عمال ينضف شقته
ومن الإنتظار راح يتقتل

حاتنورا يا ولادي توصلوا بالسلامة إن شاء الله...

حكاية ورده

كان ياما كان
من قريب
مش من زمان

كان فيه صبيه
وصبي هيمان
لمحتهم ورده

سارحين في المكان
مشبكين إيديهم
وبالحب القلب عمران

الورده من رقتها
لما فراشة لمستها
عطرتها بريحتها
وقالت لها روحي
للعاشق الولهان

لما الفراشة حامت
البنت غمضت
كأنها نامت
وقالت لمحبوبها
دا عطر من الجنه

الوردة سمعتها
قالت لصاحبتها
ياريته يهديني
ليها تحضني
وأهنأ بصحبتها

ردت عليها قالت
يا عبيطة حـ تموتي
قالت لها وضحكت
دي حياه وسنتها

قرب الحبيب منها
فتش في اغصانها
مسك فـ رقبتها

من شوكها إتألم
وآلامه آلمتها
دمعة ندي فرت
بلت ورقتها
صعب عليها الولد
مش نهايتها

قطعها وحبيبته أخدتها
حضنتها بحنيه
وأوام شمتها
الوردة من رقتها
رقت وباستها
وبإبتسامة رضا
إنتهت حكايتها

أما العبره هنا
فيه شيء يعيش للأنا
وأشياء تسعي للفنا
وسعادة الغير غايتها

طال اإنتظار ... وأخيراً

من يوم ما وصل
وعن حلمه ما إنفصل
من يوم ما وصل
كان نفسه حلمه
يبقي حصل
لكن اللي حصل
الحلم بعد سنين ثلاثة وشويه
حصل
ولو إن الحلم للمدي ما وصل
أخيراً بعد طول الأمل
ولاده جايين ينوروا وحدته
أخيراً إحساسه راج يكتمل
برؤية نبض قلبه ومهجته
ولو إنها مجرد زيارة
لكنه بيها حـ يحتفل
عمال ينضف شقته
ومن الإنتظار راح يتقتل

حاتنورا يا ولادي توصلوا بالسلامة إن شاء الله...

فلوكة

في وسط النيل
سرحت بفلوكه
وشمس الأصيل
طالة تصبح
علي ليلة مهلوكه
والنيل بيجري
وخيره فايض
عصافير تشقشق
وطيور تبحلق
تنزل وترشق
والمية تبقبق
وفجاة تطلع
فـ منقارها سمكة
قرموط محندق

وهناك عيال
قاعدين ببوص
والرجل حافية
في الطين تلوص
الواد مركز
مع سمكة حِركة
عمال تنقر
في الطعم لكن
حبه بتظهر
وحبة تغوص
ومرة واحدة
غطست ما قبت
وهوا شد جامد وتبت
طلعت معاه
بلطية حلوة
والفرحة عمت

فضلت سارح
علي خد نيلي
ومن المقادف
إتهد حيلي

لمحت واحد
واخد عياله
فوق الحمار
عـ المدرسة
وهات يا شي
وهات يا حااا
والعيال متونسة
ضحكات برئية
مجلجلة
بس يا حسره
مفلسه
يابا هات فلوس
نجيب لقمة
ولا غموس
منين يا ولد
الارض صبحت
رافضة تجود
حتي لو
طينها نبوس
آل إيه هروني
كيميا ومجاري
وبوروا الأرض جاري

الولد قطع الكلام
والتاني علي كتفه نام
والأب صار
حاله مش تمام

المهم
قضيت نهاري
فـ النهر جاري
وفي النهاية
خدت قراري
الرحلة حلوة
ما أقدرش أداري
لكن اللي شفته
في عقلي هاري
لحد إمتي
حـ نفضل نداري
دي بلدنا خيرها
فـ فلاح أراري
وطمي بلدي
يعمر صحاري
بس هيا محتاجة واحد
فاهم وقاري

كباب الحانوتي

يا مواطن يا جعان
إهدي كدا
وبلاش جنان

مش كل لحم ينشوي
أصبح كباب
ومش كل واحد وشه مهبب
يبقي هباب
في مصرنا فيه حانوتي
شاب وخاب

حاصر آلاف من البشر
وجهز فحمه وإنتظر
خرط بصل، فرم جزر
مستني الموت المنتظر
اللي يموت بيه ينغدر
وفي ثانية يبقي
كباب معتبر

وآدي الحانوتي
عمال يخدم
ويقول دا لحم
بقر
لأ فشر
بقي هما برضو
اللي بقر؟
والله وبرغم الحصار
هما لسه
شعب حر

إسمع يا مصري

يا تبات جعان
وضميرك تصون
يا تاكل وتسكت
وضميرك تخون
وفي النهاية
فيه رب عادل
لازم يجازي
اللي يخون

هوه سؤال

راحت فين أنفلونزا الخنازير؟
واللي كان عاوز يملين
وأحلامه بدأت تطير
مش كان صاحبنا
مرض جداً خطير؟
ولا التصاريح النارية
من ديوان سيدنا الوزير
وإفتحوا قبورجماعية
أكبر من ترب الغفير
والطعوم دي ميه ميه
إسألوا حتي المدير
الإشاعات دي مفترية
إكتموا وبلاش جعير

الطعم دا أوروبي خالص
وعـ الحياه مفيش بوالص
عاوز تاخد الطعم زيح
ماعاوزش موت وإستريح
لكن تبقي واحد مقيح
وفي الجرايد تقعد تسيح
وتلسن عـ الوزير؟

طب الوزير دا ذنبه إيه؟
دا الغلب بادي عليه
ولو الأمر فـ إيديه
كان وفر تمن الطعوم
وحقنكم دي .دي.تيه

يا شعب الغبره كفايه
بطلوا شكوي ونكايه
الوزير دا كل جمعة
بيصلي لابس عبايه
يدعي فيها للضحايا
اللي ماتوا بدون شكايه
واللي مات من غير ما يسأل
مين السبب في مبتلايه

ماتخربوش فرحتنا

ما تخربوش فرحتنا أبوس إيديكم
الشكر لربنا هوا اللي منَ عليكم
وحققتم الأنجاز بقلبكم وعنيكم
دول 80 مليون كانوا بيدعوا ليكم
-----------
لا تقولي شكراً لريس ولا مغول
اللي طاطي عامل دلوقتي غول
كله قال تكسبوا؟ مش معقول
ولشعبكم تفرحوا؟ سمعني قول
------------
غنوا غنوة شعب للفرحة إفتقد
وبلاش مداهنة مع اللي لما إتهانا قعد
واللي قال الكرامة خط احمر وبعدها رقد
وساب الجميع يكسر إشارة المصري يا ولد
-------------
تكريمكوا نلتوه من الغلابة الفرحانين
اللي طلعوا للشوارع يغنوا للفجر سهرانين
يقولوا ربنا أكرم منتخب الساجدين
ليكم ألف تحية علي الخير متجمعين

تيران خضرا - إهداء إلي منتخب الجزائر للرجبي

لعبوا الولاد كورة كفر
الأدب في قلوب البعض إنحفر
لكن بعضهم بالأخلاق كفر
هيا رياضة بيها المباديء تنتشر
لكن نلاعب تيران ماهيش بشر؟
وقت المعارك آه عايزين تيران قلوبها حجر
لكن الرياضة للمتعة والتغلب عـ الضجر
شفت ماتش أو معركة مع الغجر
فيها فريق نال الرضا وثاني أصبح محتقر

واحد كسر لعيب من عندنا وخد جزاته وإنطرد
ضربة جزاء وعبد ربه حطها لا تصد ولا ترد
وشوشو وسطه أتجزع من كتر ما إنتني واتفرد
قام للحكم وروصيه دبه بسؤ خلق بيه إنفرد
الحكم دروخ وكارت أصفر بطول دراعه فرد
والله طيب

فضلوا التيران هاتك ياضرب في رجال آخر أدب
وهوب جون تاني حكاية قلنا الفوز لينا يا رب
والكروت الصفرا طالعة نازله كأنها بتعدي مطب
وبعد حبة راح الخكم طاردلوا لاعب قليل الأدب
وشوف بقي لما متعب خرج وسرك مصر إتنصب
آدي زيزو داخل بكورة روعة ولم ثور وشاط وهوب
أدي جون كمان آخر حلاوة في مكان خطير ياللعجب

حبيبي جدو ماشي بكورة ونازل مفرفش
قام شاوشي الأقرع فـ رجليه مخيش
الحكم فوراً بطاقة حمرا طلع ولوش
نزل البديل مرتعش ومفصل ركبته مبوش
وقبل النهاية بحاجة بسيطة جدو جه وراح مهوش
وجون جميل والشبك عمال يحوش

خرج الولاد مـ المعركة إصابات طفيفه
وخرج التيران منها بعقول خفيفة
وأمست ليالي التيران كوابيس مخيفة
وشعبنا والله ما قصر في غنا ونكت لطيفة
تحية ليكم يا رجال بجد بأخلاق نضيفة
وآسفين يا خضره علي الفظيحة الظريفة