الإتنين 23-2-2012

مصر والإتنين سكانك ...

نظام فاسد وعبيده بيهم الكل دانك ...

وثوار احرار دمهم علي ثوبك زانك ...

ناس عاشوا يقتلوا ولادك ...

وشباب ضحوا وماتوا عشانك ...

فاسد واعوانه خانوكي ...

وشباب عاشقك عمره ما خانك ...

ثورة حتي النصر 21-2-2012

انا عمري ما كنت خايف

زي النهاردة

خايف ترجعي تاني

ف حياتي حاجة عارضة

زي الفرح و...السعادة

والسياسة والمعارضة

خايف

وخوفي دا مشروع

وعارف

إن مافيش رجوع

أحرار

وصوتنا بقي مسموع

مساجين

لكن الجبين مرفوع

شهداء

زغاريد ماليها دموع

قلب

علي البلد موجوع

خايف

لإن النفوس ضلت

وبعد النوم ف الطله

ويوماتي الناس سوا صلت

صبحت علينا جمعه

ونفس النفوس جمع ما صلت

وكل واحد عمل فرقة

والخلايق من كدا ملت

واللي فقد سلطانه بيتنهد

وبالاب والابن والحيزبون بيتلت

وداير ينفذ وصايا الأب بحروفها

والفوضي ع الفاعلين دلت

والاب بيقول لعياله

آدي العبيد إتسلت

لأ

خوف إيه اللي يصيبني؟

أنا اللي النخوة

صاحب مصاحبني

وزميلي اللي وقف يوم الغضب

يداوي جرحي .. وبنظرته يعاتبني

ليه حميتني بكتافك

وحشت رضاصة كانت ليا اصيبها وتصيبني

انا مش خايف من اللي جاي

ولا فيه ف قلبي ذرة شك

وبكرة افكر كل عداي

إن الفاسدين باب واتسك

والمولي ناصر ثورتنا

بس الساسه يبطلوا عك

رافض للمعونة 17-2-2012

أنا رافض للمعونة

رافض ع القفا يلطعونا

ولو ح ناكل عيش بدقه

أكرم من ذل العفونه

... واللي بيطالبني أساهم

البعيد باينه واهم

ساهم إنتا بكل مالك

وبعدها يبقي التفاهم

حسان وطيب والفلول

والكل بيلعب ف العقول

لابس دقن وجلابيه

وهوا خدام المغول

دول هما عبيد مبارك

اللي خلوك كاره لجارك

ومكان ما سيدهم يقول

كان يقولوا إربط حمارك

الا م سمعنا عويلهم

ع اللي طلعوا وشدوا حيلهم

هدوا أركان النظام

ودولا بيعضوا ف ديلهم

أي سلطة تيجي تحكم

يجي راكع وبايده يبصم

يسجد يمجد ف اللي حاكم

ولو سقط تلاقيه بيلطم

يا حسان كلمه حاقولها

مصر ربنا حامي عقولها

ولو عاوز تجمع معونه

اشحت ولا عمرك تنولها

بكرة حانجمع معونه

لما ننتخب ناس يحكمونا

ولا نحتاج دعم غربي

ولا اللي زيك يقرفونا

عدل الإله 14-2-2012

لولا علو الصوت

وإنكسار الرصاص

... ورغم ريحة الموت

وغياب القصاص

وشجاعة فاتت ف الدروع فوت

وموت ما كان منه مناص

وقف الزمن مبهوت

والتاريخ بيدون كلمة القصاص

لولا دا كله

كان البعيد لسه حاكم

وإبنه لساه للعبيد شاكم

والعبيد ما لهم ديوان مظالم

ولو يشتكي العبد منهم يطلعوه ظالم

والتهمة إشتكي ... والحكم آثم

لكن خلاص الصوت عدي جدار الخوف

عدي وداس علي رقبة الحلوف

وداس معاه م الكلاب صنوف

عز وسرور وحبيب والباقي مش موصوف

ولو مش مصدق تعالي ع السجون شوف

اللي فسد بعد الحرير متغطي بخرقة صوف

نايم علي البرش ف الركنة دي محدوف

فز قوم عندك زياره ... صوت الشاويش مألوف

نفس الشاويش دا اللي ع اللقمة عاش ملهوف

بينادي ع المحابيس ووشه بقي مكشوف

لا عاد خايف ولا قلبه ساكنه الخوف

آدي الوزير نفسه محبوس وسط ألوف

والتهمة إجرام والمظالم علي رقبته سيوف

ومهما طمسوا أدلة م المظروف

عدل الإله ساري ودا شيء معروف

وبكرة نكمل اللي بدأ أو نرحل شهدا لربنا

ماهو كل اللي ف الدنيا ضيوف

عدت سنه 11-2-2012

عدت سنه يامه

ولسه فيكي الداء

لا علاج نفع يامه

والإخوة زادوا عداء

والمفسدين لمه

جمعولك الاعداء

وادي الولاد لامه

من طينك الأشلاء

ويكوموه لمه

ويصنعوا ترياق

عزم وعليه همه

والأصل ف الاخلاق

هما الولاد همه

يبدوا لمصر ولاء

بكرة النهار لمه

يطلع يزيل أنواء

يا مصر دي غمه

علي طره نرحلها

نلاقي وشك راق

تصبحوا علي حرية

لما تكون الأيادي السودا مرعوشين ... والوشوش الشيطانية مكرمشين ... وتلاقيهم ع الكراسي معششين ... يبقوا عصابه كبيرها إسمه مشين

صامد 31-1-2012

أنا إنتصار الحق عـ البهوات

أنا ضي الصدق فـ الظلمات

أنا اللي واقف ف الميدان صامد

ولما إنقتلت قالوا بلطجي مات

-------

أنا إنتا وكل الناس

صحاب الدم والاحساس

رفضنا نورَّث الواطي

وقطعاً رفضنا إننا ننداس

-------

ظهر بينا صلاح الدين

أيوبي ومن عابدين

وقف ف وش خرطوشهم

حمي البيوت والميادين

-------

ورَّانا الميدان آيات تترتل

مابين مصابين وشهدا بتتقتل

كان الدعا والصلاه منجا

من شياطين علينا تتكتل

-------

يا أولياء فـ الثورة صالحين

اللي معاه ربنا يقدر عليه مين؟

هما عبيد فرعون وهامانه

وإنتوا بالإيمان جامدين

-------

الثورة دي نور من ربك

خليك ساير بقي علي دربك

ومهما قالوا فيك العبر

كمل وإدعي ربنا يزول كربك

-------

حكمة مهياش متباعة

لك سهلة وعالخسيس مناعه

دولة الظلم لحظة

والعدل دولتك لحد ما تقوم الساعة

نازل بكرة 24 -1-2012

يوم ما خرجنا بالعشرات ومن الضرب مسارنا إتغير

مين كان عارف إن الثورة أكيد حاتغير؟

مين فينا صدق إن الحلم معادش صغير؟

...كان فينا واحد بس مصدق والباقي لأ

الواحد ده أنا , إنتا , لا دولاهما إن جيت للحق

اللي نزلوا كان الكل هوا الثورة وهوا الحق

نزل الواحد دب برجله فوق الطاغي ودق

دق في نعشة مسمار زلزله وعمل شق

وبعد ما فات العام دا بطوله

رجع الشاب وجدد قوله

لسه بواقي نظام وطبوله

والإعلام محشي بفلوله

حتي القضا حاكم ب قالوله

والمخلوع أدوية يدوله

والمجلس شغال دلدوله

بص الواد وقال عند أمه

بكرة معاد نزحف ونلمه

ونعلقه في ميدان الثورة

ندبحه ونشرب من دمه

بكرة نخرج تاني ملايين

ع الميادين زاحفين زاحفين

يقولوا مؤامرة يقولوا تخريب

ويتخبوا في السراديب

بعد ما قتلوا شيخ وطبيب

لا وكمان منعوا الأنابيب

ولا بطلوا حتي تهليب

والمسخرة كم الأكاذيب

والتلفيق ويا التعذيب

وبعد دا كله تقولي أغيب

لا أنا نازل وانا ما باكلش من الألاعيب

نازل أقول للعسكر يرحل

عيب ما تجيش؟

هوا انا قلت قرش حشيش؟

العيب فعلاً لما تكون سياسة مدنيه

يقوم يتدخل فيها الجيش

تخرب طبعاً

ونسلبس بعدها كلنا خيش

أشوفك بكره ... إياك ما تجيش

صعيدي حر

جالوا زمان إشرب يا ولد من نيلها ...

وشربت ...

ولحد دلوك أني شارب ...

دا حتي الكوع عم ينجط من سيل الدما الهارب ...

ولما ادندن ع الربابه اغنيلها ...

... ويوم موتي فداها فوج بيتي يعلجوا كهارب ...

ويوم مخرجت احررها ...

جالوا دا واد بلطجي هارب ...

يا أمي يا فطماني علي جوع ...

خلاص معاد فيها رجوع ...

عنحررك م اللي نجس محاربها ...

ما اللي ربته الحره ما يعرفشي لغير ربه ركوع