فيه ناس بتسيبنا وتعمل فارق ... ودا بيفارق وماهوش فارق ... وناس كل ما بنقرب تبعد ... وناس تقرب تزيد الفارق
تعليق:
الناس خمستلاف صنف ولون
فيهم عالي الاخلاق وفيهم الدون
فيهم اللي يدفنك واللي يعليك ف الكون
واللي تحتاجه ينصرك واللي يبيتك مغبون
تلاقي فيهم المفتري ومنهم المطحون
ماهو الناس علي كل شكل تكون
--------------------------
حزين اللي عاش الحياة مستباح ... لو يوم إتسلب يقول عوضي علي اللي راح ...قالوا له بكرة نثور وتلاقي عطر الحرية فاح ...قال دا كيلو زبدة طلع عليه الصبح لقيته ساح
--------------------------
حاولت أوجد علاقة بين الحياة والموت ... لقيتها في العلاقة بين السكات والصوت ... السكون بيملي المكان في إنتظار صح الكلام ... والحياة بنعيشها نعمل للأخرة قبل الفوت
--------------------------
سألوا السفيه فيه بين الآحبة رجوع؟ ... قال فيه ذل وخضوع ... سألوا الحكيم همس وقال ... الرك علي صفا مية الينبوع
--------------------------
بصيت فـ وشوش البشر لقيت أشكال وأصناف ... فيهم اللي عندو حيا واللي لا يختشي ولا يخاف ... وشوش مكسية خير ووشوش ملمحها جاف ... يا هل تري نظري سليم ولا العبارة حبة إستلطاف
--------------------------
بدل وشنبات وعطر فايح في المكان ... الكل قاعد اللي مدلدل واللي متنح للألعوبان ... يخرب ما يخرب إيه يهمه ولو يفجر كمان ... أخر المتمه مهما طغي غيره حايخش اللومان
--------------------------
سارح في ملكوت الله وواخد الحياة عافية ...نفس المناظر متكررة سما كتير غيوم وشوية صافية ... تروح شخوص وغيرها يجي والدنيا ماشية ... أتاريني يا ولداه تور مربوط في ساقية
--------------------------
يا مطرة رخي رخي ... عـ الهم رشي وبخي ... يا رب سقيا ورحمة ... وغسيل ونضافة لمخي
--------------------------
يا زعيم بجد خنقتنا ... نفسي في يوم نقول لك وحشتنا ... يوم يغور الظلم والإفترا من حياتنا وحلمنا ... وتغور معاك أسرتك و طغمتك ونطهر أرضنا
--------------------------
يا عم تقلك عليا عمللي كرشة نفس ... التقل صنعة ما إختلفنا ولا دمي إنحبس ... بس القرب برضو مودة وكله ونس ...قرب شوية بس حاسب لقلبي ينهرس
--------------------------
شنفت سمعي بوعود ومعسول كلام ... قعدت فاتح حنكي ومتنح بإهتمام ... أكيد الزعيم حايثور في خطبته ويجبرهم عـ الإحترام ... الوكسة آل طلب هدوء من الصحف والإعلام
--------------------------
حب الحياه مش عيب ولا هوا حرام ... فيها الولادة والرضاعة وحتي الفطام ... وفيها تعاسة وسعادة وصلح بعد الخصام ...المرزق اللي يعيش الحياه ويبدي للآخره إحترام
--------------------------
كباية نصها ميه والنص التاني هوا ... الإتنين أصل الحاة وفيهم طهرة و دوا ... الحوت في البحر عايش والإنسي دايب فـ الهوا ... اللي يجور علي نص غيره يبقي علي موته نوا
--------------------------
مليت الدنيا صياح وجعير ... ملعون خاشه اللي يهيني وغد و حقير ... لكني اتكتنمت لما كان المهان ديني ... إياكش اتلهي أنا واللي شبهي مثلنا مثل البعير
--------------------------
صابح قلقان ومـ العتمة أنا خايف ... شايف ضلام في عز الشمس ليه مش عارف ...عمال أحسس لعلي ألمس أمل لإني مش شايف ... لمست حاجة ملظلظة دا اكيد الوهم لأن الأمل ناشف
--------------------------
أنا مش نكدي ولا غاوي أرف ... دا حتي الحياة مبهجة والعيشة ترف ... السعادة مغرقاني والهم إنصرف ... الأكادة إن الهنا ينوله اللي بفضل ربه إعترف
--------------------------
حادث تصادم بس ربك ستر ... هما خمس دقايق والكل حضر ... إشي اسعاف وإشي شرطة وبشر ... دعيت في يوم اشوف في مصر زيه نظام معتبر
--------------------------
وعندك واحد هولندا وصلحو ... مش لسه شارب سويسرا ولا أنا اللي كنت بأطفحو ... ساكت ليه يا مسلم علي هوان مصير الريحة تفضحو ... دا الكبش لو حد هوب صوب مدنته راح ينطحو
--------------------------
في سويسرا عملوا إستفتاء علي مأذنه ... هيا دي الحرية يا حضر ولا دي بداية المنتنه ... آل حموم إنسان وحرية ومدينه ... إثبت يا تاريخ مين عنصري خليها تبقي مدونة
--------------------------
دول بتناطح دول والصراع نووي ... وإحنا عندنا الصراع كروي ... الناس للقمر طلعوا يكتشفوا إيه يحوي ... وإحنا ماسكين فوانيس وبنغني وحوي
--------------------------
القمر قال لنجمة مالك عليا متأمعة ... أنا اللي الكل شافني في عز المعمعه ... وإنتي في وسط ملايين الكواكب مجرد إمعة ... صحيح بيكي بيهتدوا لكن أنا برضو سيرتي مسمعه
--------------------------
مأمأت لما صوتي إتنبح ... ربنا أمر يدبح الإبن لكنه ما إندبح ... فداه بفدو عظيم وصار عيده فرح ... خبنا والأخ حاول يدبح أخوه، مدبحش صحيح، لكن جرح
--------------------------
دبيت برجلي في غضب ... ما حد ثار علشان شهيد بالدم إختضب ... والكل عشان ماتش كورة صرخ وشجب ... سبنا صلب القضية ومسكنا فـ عجب الذنب
--------------------------
قنديل وضيه شع في وسط ضلمه ... نشر علم وإيمان ياما إتجمعنا عليه لمه ... ولما المرض إشتد بيه وكتر همه ... لا سألوا عنه في شدته ولا بعد الرحيل ، الله يخيبك أمه
--------------------------
با خروف العيد يا غالي ... غلاوتك أصبحت أمنية في خيالي ... حالي أصبح عدم. حاتقول وأنا مالي؟ ... لا إنت صعبان عليا ولا يصعب عليك حالي
--------------------------
أنا اللي من النيل روي عطشو ... وعلي مر الزمن الحاكم الظالم ما هزني بطشو ...أنا اللي قلبي سليم لا ضحك علي مخلوق ولا غشو ... أنا اللي حبي لمصر تاج القلب متربع علي عرشو
--------------------------
لو كان فيه ناس تتحب فأهل مصر ... تحبهم لو جوه قمقم أو حتي قصر ...تحبهم في إنكسار أو وقت نصر ... لا فيهم طبع الهمج ولا عاميهم كبر
--------------------------
هيا الكورة مش رياضة ولا خشونة وضرب ... فاكرين بالهزيمة تزعلونا أو تخلونا في كرب ... جتكوا خيبة يا همج و بربر ... كسبتوا ماتش وخسرتوا شعب
--------------------------
من قديم الأزل كان الزعيم أول من يواجه في الميدان وأخر من ينسحب ... في العصر ده ولاد الزعيم تحت الحراسة يحضروا ومن سكات يتبخروا ولا حد منهم ينضرب ...وباقي العبيد بالحجارة والحديد بيتها إتخرب ... رجعوا صحيح لكن بعد الإهانة والغريب علي إيد عرب
--------------------------
فرقة وتناحر وقلة أدب ... ناس رايحة تشجع وناس رايحة تعمل شغب ... عيون تروح وجراح تنوح مين السبب ... وريس همه ولديه سلموا ياللعجب
--------------------------
حزين علي اللي حصل من شوية حوش ... بأدعي ربنا يسلط عليهم حنش ... وإنتا ياللي إسمك أبو تلفيقة ... ما تسوي حتي في حزامي عليقة
--------------------------
أقول للبطل عداك العيب وأزح ... بتقاوم المحتل وسيد اللي تحت الإحتلال رزح ...تضرب وحجرك في جتتهم نقح ... قاوم ولا يهزك صوت كلب لو نبح
--------------------------
دخلت سيما فيلم تسعة وتلاتين قدامي ... شفت طفوله وصبا وشباب وأماني ... أيام حلوة كتير مرت ورجعت مررت تاني ... ودلوقتي ملهاش طعم ياتري العيب فيها ولا في لساني؟
--------------------------
قلبي مربوط بشرايين وأوعيه... ينبض تجري دمايا ليها مش ليه ... طب لمين أشتكي والسبب هيه ... قلت أشتكي للي فرض للقتيل ديه
--------------------------
في بركة من ذكرياتي دست برجليا ... يادي اللحوسة إيه اللي صار فيا ... مش قلنا مصيرها تنشف ... أتاريها زادت بلة أو كما هيا
--------------------------
شطحت بخيالي عديت سبع بحور ... نزلت علي رمش عين من عيون الحور ... نني عينها لمع لما رأي النور... صحيت من حلمي لقيتني جوة سجن وسور
--------------------------
في الضلمة شفت عفريت إتخضيت ... قلت إنصرف قال لي ياريت ... لو كنت حضرت بإرادتي ... كنت عن اللي قتل قريت
--------------------------
فنطاس سعادة إنفجر أنا قلت خير ...لا شفت شجر إنزرع ولا حفروا بير ... كل الحكاية لعيبة فازت فوز مثير... ياما نفسي تكمل الفرحة ودا مش كتير
--------------------------
حضرت حوار بين الحق والباطل ... الحق قال حقي أنتشر التاني ماطل ... بدأ الحوار وإنتهي والخلاف حاصل ... الأكادة لو الحق إشتغل التاني يصير عاطل
--------------------------
حلمت يوم يبقالي بيت ... مع الايام حلمي كبر ... في يوم من النوم صحيت ... قالوا نال حلمه أصله صبر
--------------------------
ليه يا جبان شايفني ضعيف؟ ... هوا الأدب للدرجادي مخيف؟ ...لو كان سلاحك إساءة أدب ولفظ عنيف ... فـ سلاحي كلمه حق ونقد لطيف
--------------------------
فركت عيني وبصيت عـ الأمل ... لقيته عالي في السما كما البدر إكتمل ... قلت إزاي أوصل إيه العمل؟ ... رد صوت العقل لو سعيت يصبح وصولك محتمل
--------------------------
ياللي نويت الغدر يا قاسي ... بكرة تدور الدواير وانت ناسي ... الغدر صفة اللي يشيلها يعيش ويموت خاسي ... واللي غدر مايسوي غير مداسي
--------------------------
شجبت صرخت عملت صخب ... طرت نزلت شفت العجب ... ناديت يا خلق خيرنا إتنهب ... رد صوتي يا قليل الأدب
---------------------------
ناديت من تحت سابع أرض ... يا خلق هو إسمعوني بالطول والعرض ... الباطل ان سكتنا عليه بقي فرض ... والحق اللي يحيد عنه يستحق الطرد
----------------------------
سأل القتيل إيه اللي حصل ليه الصخب... حكموا علي اللي قتل ولا القاتل هرب ... بكي أهل القتيل بحرقة وغضب ...اللي دافع عن القاتل باع ضميره ونصب
-------------------------
كان ياما كان شوية شباب شجعان ... غاروا علي دينهم!! ، طبيعي ، إيه كمان ؟ ... فكروا ، قرروا ، قاطعوا وكان اللي كان ... اللي كان عامل أسد أصبح كما الخرفان
-------------------------
ياللي نويت الغدر يا قاسي ... بكرة تدور الدواير وانت ناسي ... الغدر صفة اللي يشيلها يعيش ويموت خاسي ... واللي غدر مايسوي غير مداسي
-------------------------
خلصت الحكاية قبل ما تبتدي ... كل بادي وليه نهاية ليها نهتدي ... نقاوح نعارض علي قلوبنا نعتدي ... وفي كل مرة لازم بالنصيب نرتضي
-------------------------
كشف الطبيب علي قلبي صعب عليه حالي ... دا قلب شب شايب متربي علي الغالي ... والعلاج يا طبيب دانا قلبي خالي ... الحل تزيح الهموم وتقول للأفراح تعالي
-------------------------
نقشت علي بيضة أول حرف من إسمي ... طلعلي كتكوتها يادي القرف نملتلي جسمي ... مالقيتش غيري أنا تشخبط قبل ما تسمي ... قلت يادي الهنا شكلي بقيت مجنون رسمي
-------------------------
لما الحياة تبقي كتاب بنسطره ... فيها صفح ضلمة وصفح يادوب منوره ...سطور بتفرح وسطور فيها منظره ... وسطور بنشطب عليها ونخفي أثر المجزره
-------------------------
كان زمان بينهم حكاية وغرام ... ولد وبنت روحين عايشين في إنسجام ... كبروا سوا وجه وقت الكلام ... إحنا شاريين البنية يا تري حاتبيع بكام
-------------------------
إذا شعباً أراد الغموس ... فلابد يشتغل ويجيب فلوس ..قالوا التنابلة ما تشتغلش قلت لا دول التيوس ... إما تقوم دلوقت حالاً أو تعيش وتموت موكوس
-------------------------
يا دنيا إيه هوا كله ضرب ما فيش شتيمة؟ ... ردت وقالت وإنت إيه كله طيبة ما فيش حتة لئيمة؟ ... قلت طب أعمل إيه للي ربا وما زرعش فيا صفات ذميمة؟ ... بصت عليا بطرف عين وبرطمت دانتا حكاية تنحكي فـ قعدة نميمة
-------------------------
يوم الخميس والجمعة من كل وييك ... أقوللي إنت للغربة والوحدة ليك ... واحشني شقاوة يوسف ويا عمر لمسة إيديك ... إيه إللي خدته من غربتك غير نتف ريش من جسم ديك
-------------------------
ياللي شايل الهم علي ضهرك زكايب ... الهم راكبك ولا إنت للهم راكب؟ ... طوع الهم وإغلبه ما تبقي خايب ... وإلا الهم حايغلبك يابو قلب دايب
-------------------------
دنيا وكل اللي لينا فيها خطاوي ... فينا اللي ماشي لـ جنة وفينا اللي عالنار غاوي ... واللي علي الخير يدور واللي علي الشر ناوي ... يا إما عارفين طريقنا يا إما حمير حصاوي
-------------------------
صباح غرد فيه البلبل علي الشباك ... إنشرح صدري وقلت من صوتك أنا بأهواك ... بصوتك بتزرع وزرعك بيطرح فرح هنا وهناك ... ولما تروح لعشك الخالي تلاقي الحزن علي بابه بيستناك
-------------------------
قال الحكيم أبو شماعة المكوجي : ... بووووووووفففففففف ... إفرررررد وشك ... لا تغشني ولا أغشك
-------------------------
قلبي وكلاويا وكبدتي وبنكرياسي... حشايا وقربهم ليا كما قربي لناسي ...كان فيه بعضهم جوة قلبي بس أنا ناسي ... ولما آن الرحيل سابولي أنا مآآآسي
-------------------------
ياللي كان يومك سنيني ... وفـ دفاك حضني وحنيني ...وأما أتوه إنت تلاقيني ... كل ده راح وإنتهي وفضل ليا أنيني
-------------------------
يا موج البحر يا عالي بالله عليك هدي ... إرتأيتك جاي من بعيد قلت
عدي ... أعند وأعافر فيك الود ودي ... مقاديفي إتكسرت لا أنا ندك ولا إنت ندي
-------------------------
حمال الصبر قرب ينخ خلاص ... لا قادر علي الحمل ولا من الصبر مناص ... الصبر للي صبر رحمة وإخلاص ... واللي علي الصبر ما قدر من قلة الصبر لاص
-------------------------
لازم في حياتنا نوضل بعد ما تهنا ... وحاييجي يوم نشبع من بعد جوعنا ... ومهما بعدنا عن هدفنا لازم فـ يوم رجوعنا ... ياريت في الرجوع نفوسنا مـ نكون بعنا
-------------------------
لو كان الأمر أمري ... لو كان فيه شيء في يدي ... كنت أقدر أشتريلك كابوتشااااا
مش خس بلدي
-------------------------
هازوء حسني فشل يا منز ... اللي باس جزم اليهود وفاكرها كنز ... رمم معابد وإعتذر وعمل إبن عز ...من علي الكرسي غور بقي قوم فزززززز
------------------------
في زقاق وحواري بيوت صابها خرس ...حيطان قديمة وأبواب عتيقة عليها حرس ... وصوت كلاب بتنبح وفـ رقابها ألف جرس ... بصيت بمد البصر لقيت الأمل جاي راكب فرس
------------------------
بتفيفور وكحك وغريبة ..ووحدة .وبعد وغربة متعبة ... وناس كما الحجر بعيدة وقريبة ... في إيدك إنت تبقي عيشة حلوة أو مهببة
------------------------
يا دنيا إعملي ما بدالك فيه ... يوم تيجي في صفي وكام يوم عليه ... أحبك تكرهيني , أكرهك تضميني بحنيه ... إنتي تقتليني وأنا أدفع الديه
------------------------
يوم ميلادك كنت إيه؟ بلبوص ... كسوا بدنك وعلقولك خرز وفصوص ... كبرت مفتكر ان الهدوم تسترك ... ستر العيوب ليوم الدين منقوص
------------------------
عايش علي أعصابي ومتنح ... تايه لا مغمض ولا مفتح ... مستني جرعة أمل تجيلي أفرح ... أو حتي حبة ألم في قلبي يجرح
------------------------
عايزنا نرجع زي زمان؟ ... قول للزمان إرجع يا زمان ... وهاتلي قلب لا داب ولا حب ... ولا إنجرح ولا شاف حرمان
------------------------
حكمت علي قلبي المحن ينكسر ... أرمم شرخ من ناحية تانية ينتشر ... ألصمه أهو يمكن همي ينحسر ... ليا رب علي جبر القلوب كرمه ما يقتصر
------------------------
مش حاقول إنك ملاكي ... ولا إن روحي فداكي ... كل ما ابعد مسافة... أرجع يزداد إشتياقي
------------------------
إعتبرني ميت وإنت حي ... إعتبرني رايح وإنت جاي ... إعتبرني فلب عادي ... وإنت قلبك ماله زي
------------------------
يارب إمسح ضيقي من صدري ... واستر لهفتي بكسوة من
صبري ... إحميني من نفسي وما تملكني إمري ... وإرزقني الرضا علي اللي فات واللي جاي من عمري
------------------------
يا مفتري لو قادر تاكل فرخة مسكينه ... ففيه سبع ممكن ياكلك بلا شوكة وسكينه ... وإن كنت عضلات وجسمك شكل فترينه ... بكرة تعجز ويقولوا محتاج اللي يعينه
------------------------
مشيت علي جمر وشوك اللهلبة ... صبحت علي قلبي مفأفأ فأفأة ...داويته بـ شروة حبوب وسأسأه ...كشف الطبيب وقال قلبك محتاج غذا مش نأنأة
------------------------
نويت أغطس في بحر الهوي واتدلع ... أتاريه غويط ومش للمبتديء ينفع ...قلت غريق إلحقوني الكل إبتدي يخلع ... شفت طوق نجاه ولما وصلت له لقيته مخلع
------------------------
ضاع مني حلم وسط زحمة طريق ... سألت عنه الخلايق اللي شوح واللي بين لي ضيق ... دورت فـ اماكن بعضها واسع واكترها خنيق ...رفعت إيدي بالدعا يارب . يا رب لا تحملي ما لا اطيق
------------------------
البدر طالع في السما عالي ... لما شفته قلبي رق علي حالي ... من بعيد شايف قمر وقربه يحلالي ... ولما قربت لقيته مليان تجاعيد وخالي
------------------------
يا إنسان ياللي عايش فارد قلوعك ... كما الطير اللي طاير فوق ربوعك ... أوعاك تغتر باصل نوعك ... دا كل ما عليت تزيد شدة وقوعك
------------------------
يبقي الحال كما هو عليه ... وعلي المتضرر خبط راسه في الحيط ... اذا اردت ان تطاع ... فبطل استنطاع
------------------------
في خضوعي للي خلقني وجدت عزي ... لو مصايب هزت جنال عقيدتي ما تهزي ...أصل اليقين في صدق ديني هوه كنزي ... وقرآني كلام ربي هوه حرزي
------------------------
رمش عين صابني علي سهوه ...نزعته بسرعة ساب في قلبي فجوه ...سألوني حاسس بألم؟ قلت بالعكس نشوه ... قالو قوم يا منيل لـ ندعي عليك دعوه
------------------------
عديت علي قبري وشي عبس ... أنا صاحي ولا ميت؟ عليا الأمر إلتبس ... جيت أصرخ أنادي صوتي إنحبس ... أكونش مت صحيح؟ ولا الأكل علي نفسي كبس!!
------------------------
ياللي نويت تاكل الحق يا غاصب ... خاف من الله ،علي كل أفعالك حـ تتحاسب ... وإرجع دي دعوة المظلوم بلا حاجب ... وإياك . إياك تبات والديان عليك غاضب
------------------------
فرخة بيضا نافشة ريشها وفرحانه ...طول النهار متأففة آل إيه حرانه ... همها علي علفتها وهيا كسلانة ... صاحبها دبحها واداها لست غلبانة
------------------------
شفت حبة مطر حيرانة ... تفضل وسط السحاب دفيانة ... ولا تنزل تروي زرعة عطشانة ... قررت تنزل وقالت ري الأرض دي أمانة
------------------------
دودة قالت لخنفسة ياختي أخلافك هدي ... لو كان علي اللولوه منتيش أدي ... قالت لها الخنفسة ملولوه آه بس الدسم عندي ... الدنيا زي ما بتاخد برضو بتدي
------------------------
رجال دولة وبدل وشنبات ....ولاد البلد إتخطفوا والحكاية خد وهات ...كله عمل ودن طين والتانية عجين وكأنه مات ... الصيادين الأبطال حرروا نفسهم من سكات
------------------------
ياللي رميت تكالك علي الرزاق إفرح ...اللي دعيته كريم وبركة في الزرق يطرح ... ولو كان علي حبة حزن في القلب تنضح ... فلك رب رحيم منين ما تدعيه الهم يسرح
------------------------
مكرونة فتل عليها صلصة وخضار سوتيه ... مع سلطة زبادي وكرنب مقطع إنما إيه... ومية ساقعة وقمر الدين ياعيني عليه ... نعمة واللي يتبتر نقول عليه إخيه
------------------------
لفحت علي كتافي شوية صبر والذي منه ... وزودت حبة رضا وقناعة إكمنه ... من غير زاد وزواد الترحال فـ الدنيا كأنه ... كفيف ماشي في عتمة مع كبر سنه
------------------------
رمضان هل هلاله وإتلمت العيلة ... علي صلاة تراويح وحاجات جميلة ... ومن بعدها سحور ورا فطور يا حليلة ... وجوامع ما بتنام في الشهر ولا ليلة
------------------------
أنا كل ما أكلم حد يقولي برب ... انا مش معترض ولا حاسس بـ دروب ...بس اللي فاقعني نبقي بنرطن عربي وهوب ... تلاقي كلمة غريبة متبوعة بـ فول سطوب
------------------------
بعيد بصيت وسط الجنينة لقيت ... بنوتة صافية من رقتها إستحيت ... عصفور صغير وقع من عشه انا اتخضيت ... البنوته ندهت حد يرجعه لحضن مامته يا ريت
------------------------
رمل وبحر وشمسية وكرسي ... منظر حلو ويمكن رومنسي ... وذكري أحلي وآمال بترسي... وورقة وقعت مكتوب عليها يا حلوه إنسي
------------------------
في عقلي زحام أفكار وصراع ... فكرة مستعجلة وثانية بتدور علي اللي ضاع ... وثالثة متبنجة وغيرها عامل صداع ... أرجع وأقول لا اللي إشتري رضي ولا حتي اللي باع
------------------------
إنكسر جوايا شيء إنطفت بعده المشاعر ... كان في يوم أبيض بريء والنهاردة لون مغاير ... سألت نفسي ليه الانكسار؟ وفضلت حاير ... رد الطبيب: دا قلب وظهر للموت عليه أول بوادر
------------------------
مسكين حاله يصعب علي الكافر ... لا عنده قوت يوم ولا علي شغل قادر ... بس عمره مافـ يوم للحرام سافر ... وعاش عمره علي الرضا ولو تساله يقولك ربنا ساتر
---------------------
حياتك كتاب فيه شخبطة ... تمسح تفبرك بلاش لخبطة ...تقطع صفح تقصقص تلزق دي مرمطة ... إفتح كتابك وفي اي امل اتشعبط شعبطة
--------------------
عارف ؟ حاتفضل تبرطم حاخرشم ملامحك ... تسهوك في نفسك أنا برضو لامحك ... تنكش شعورك تعدل ظهورك لا يمكن حاسامحك ... أحسنلك تثور عـ المر وتاكل اللي واكلك
--------------------
فينك يا مصري كلك الوبا؟ ... مسنتح متنح علي وشك بوادر غبا ... ساكت علي اللي سرق واللي قتل واللي سبا ... يا تقوم من رقدتك او انسي ان لك أرض وسما
--------------------
قابلت الشباب ورحنا سلينترو ونعم الادب ... برشنا تحت علشان فوق بيدخنوا واخر صخب ... شوية وشفت منظر يتشجب ... نازلة بشبشب يطرقع وتقولها سامعة؟ كاني من الحمام طالعة. ياللعجب
--------------------
النهاردة ايه ؟ مش عارف بس بتسأل ليه؟ مش امبارح شبه اللي يليه؟ وبكرة مش فارق عن سابقيه؟
--------------------
رجعت يا محتار وكلك شجن ... مفارق اهل وناس وايه التمن؟؟ ... غربة ووحدة ومرور زمن ... يا ريت بكرة احلي بس مين لبكرة ضمن
--------------------
ركبت طيارة حديد من ارض لوطن عديت ... قابلت ولادي وضنايا لقيت ... كانوا في انتظاري قدام البيت ... نمت الليلة في حضنهم وهديت
--------------------
ركبت المترو وفي وجوه الخلق بصيت ... أتامة وهم فـ وشوش كتير عديت ... لا لمحت بسمة وش ولا فرحة حسيت ... يا تري اللي كان السبب خرب كام ميت ألف بيت
--------------------
يا قلبي إياك اسمعك بتقول آآآآه ياني... عشت سعيد مبسوط ومش أناني ... ناقصك شوية رضي علي حبة هدوء نفساني ...يا تقتنع باللي انقسم يا ما تنبضش تاني
--------------------
عمال تلف وتدور ... نحلة انتا ولا دبور؟ ... شوية افكارك تهدي وكتير تثور ... اهدي وركز يا أمور
--------------------
يا رب ياللي خلقت من الصبار والشوك شهد و عسل ... إلهمني صبر ويقين علي حبة أمل ... رغم اني شايف عتمة طريق ضلمة مالوش نهاية يحتمل ... بصرني بنورك يا كريم واهديني لخير العمل
--------------------
مجرم طليق وبريء انسجن مين السبب؟ ... سلطة فساد؟ ولا دي قلة ادب؟ ...نيابة تحقق وطبيب شرعي منتدب ...أخرتها بريء اتعدم والمجرم هرب
--------------------
فقير معدوم ... حلم في يوم ... يقوم سعيد م النوم ... ياعيب الشوم
--------------------
ناصح من يومه وذكاؤه عجب ... حتي التراب في ايده يصبح دهب ... طمع اخينا قام نصب ... إتفضح وبات عليه من اللي خلقو غضب
--------------------
صياد علي باب الله رمي سنارة فـ الميه ... الرزق منك يا كريم وليك خالص النيه ... غمزت شد طلعت معاه بلطيه ... عاد منشكح وقال لها اشوي السمكة يا بهيه
--------------------
حبست همك يا انسان جوة قمقم ... من آن لآخر تفركو يطلع ويبرم ... ترجع وتندم لما فيك الهم يفرم ... تقول دي توبة وبالله أقسم
--------------------
وردة مفتحة علي غصن باشواك شفتها ... صعبان عليها عاشق بيقطع عنقها ... لمحت علي خدها دمعة ألم ... صعب عليها جرحه وجرحها ما همها
--------------------
يا زمن افقد ذاكرتك وإنساني ...ولا تسمح لحد يوم يقراني ... لانا فيك سبت بصمة ... ولا عاد لي فيك أماني
--------------------
شربت من حلو الغرام ينابيع ... وفي بحور االهوي كنت غريق ... لقيت اللي في الغرام ببيضيع ... وبحر الهوي مهما وسع بيضيق
--------------------
كتكوت في بيضته اصبح لحم ودم... محبوس صحيح لكن من غير ألم ... جه الأوان نقر جدار سجنو وعالدنيا هجم ... مين اللي علمك يا غشيم غير اللي خلقك من عدم
--------------------
صور ومناظر ليها العجب ...مرسومة بألوان ومية دهب...قلت أشخبط أهو أعمل صخب...صوت من بعيد هتف، ياولد بلاش قلة أدب
--------------------
شوارع ضلمة وشقوق وحواري ...ونور محبوس جوة قنديلو علي ساري...لا منه نور للي عبر من سكته... ولا قدر للنور في عتمتو يداري
--------------------
في قلبي ساكن ضني غالي ... عشقته وعشقو يحلالي ...من خوفي عليهم نومي ما يهنالي ... ولادي مع بعدهم قلبي أصبح بالي
--------------------
شفت واحد من الناس، ماله؟...مقطع نفسه بكي وعويل علي حاله...يا ناس لو بس نعرف لمين نشكي... ماكنا ف يوم الا من خشيتو نبكي
--------------------
يا دماغي بطلي إستهبال ... اللي بتعمليه ذا شغل عيال ... تلفي وتدوري وهوا نفس الحال ... ما يهديكي غير ربك مش عم ولا خال
--------------------
مواطن طول عمرو عاش شريف ... بس قلبو يا حسرة كان ضعيف... من شخطة عسكري مش لطيف ... تقع فنلتو ويصبح من بعد تخنو نحيف
--------------------
شفت عبد بينضرب , بيموت. . . سألته مالك؟ رد عليا سكوت . . . قلتله إنطق ، تمتم بصوت مرجوف . . . أنا لو اتكلمت راح اموت مـ الخوف
-------------------
قومي يا مصر من نومك ...فوقي لملمي همومك.... دانتي بهية من يومك....ولا ممكن فـ يوم ألومك
------------------
يا منجة حلاوتك علشجر .. محسودة .. طلعتلك .. بس يا خسارة .. لقيتك من الوطاويط معضوضة .. وعجبي
-------------------
يا كوسة نسبوكي لكل المفاسد والعلل . . . ظلموكي وانتي اخرك شوية محشي في الحلل
-------------------
يا كرنبة مبعجرة وكلك فشولة بصيتلك وجنبك صبية يخلق م الشبه ياللمهزلة.4
-------------------
يا موز علي السبايط مترصص . . حسدوك علي لمتك . . قلتلهم وماله انا لو لوحدي برضو حاهيص
------------------
يا فراولة حمرة ومفرفشة. دفعت فيكي من مالي.شوية لقيتك مكرمشة.سالت ايه اللي جري.قلتي هوا دا حالي
---------------
يا قرع قالوا عنك عسلي ياعيني عليه . . حتماً ولابد وجودك في كل نصباية . . آآآه امال إيييه
--------------------
يا توت عالشجر حلو ومسكر بس يخسارة منين ماتنقطف عمرك مابتعمر
--------------------
خسارة يا بصل دمعت لك عيني وانتا ما تتحملش مانا فارمك وحواوشي عاملك لكنك مسكين مابتتعملش
--------------------
يا بلح امهات كل عيد ام وانت مستوي ومعسل
--------------------
you can't easily find pure pearl but when you find it you should make sure not to loose
--------------------
لمَن زماني لمنِن ولامني . . . لُمت لمنَِنت زماني ولمِنتو . . . فضل الزمان يلمنن وانا المنن . . . لحد ما بقينا لموناتا
--------------------
زهبا الليلو طلعا الفجرو والبرغوت أررص . . أررص . . شاف النملة أللها مونكن . . آلتللو بصبص . . بصبص
--------------------
زيأ يا قلبي زيأ شويه . . . الحب زيتو غالي عليا . . . زيأ وصدع كلاويا وإفقع مرارتي وعمص عنيا زااااايأ يااااا قلبي
--------------------
يادود الارض يامشرق ومغرب . . عايش في طين الارض . . ومتغرب . . حالك كما حالي . . لنتا عن الطين قادر تبعد . . ولا تقرب
--------------------
سلمت سالم سلامة سلامي ما سلمشي . . سلام سالم سلامة سلم سلامي ما سلامشي
--------------------
ياما في الجراب يا حاوي . . . قالها حاكي الحكاوي . . . يا قلب رِق وعالحب ابقي ناوي . . . أو إتنيل وضل طول العمر خاوي
--------------------
شوكة شكت قلبي واتشكشكت . . . ملقطتها بملقاط الهوي اترعبت وركبها تكتكت. . . لما هيا مش قد الشكشكة . . .ليه جت في قلبي واتدككت؟
--------------------
كحكحت يا قلبي واصبحت ف نكد . . . كنت فاكر وقت حاجتي حاتبقي السند . . . طلعت يا مسكين طالب مدد . . . ألجأ لمين يا مكحكح غير للي ليك وجد
--------------------
يا قلبي يا ملوخية متخرطة . . . والشهقة طالعة من النخاشيش متظبطة . . . طشوا عليك الهم ويا الغم . . . بدل ما تدفع مشاعر بقيت بتدفع
--------------------
بطة بطيتها ما اتبطتيش . . . كاكتلها كاكت ولا سكتتش . . . وزيت عليها وزة ما اتوزتش . . . حتي النعامة نعمتها ولا نعمتش
--------------------
مسفعة ومتكتك لفيتها في لحاف الدفا . . . اول مادفيت راحت متحمضنة قلت انا راح الوفا
--------------------
حياتي يا سبانح من غير ملح ولا فلفل . . . ياما قلت الآآآآآه ولساني بيها دلدل . . . عمال احسب لها واحلل . . . قالولي سيبها للكريم يحلها وعليه اتوكل
--------------------
كتبت علي سطح البحيرة أمري. . . طلعت سمكة بالبشاورة مسحتو . . . طب يا سمكمك اللي انكتب عمري . . . قالت ماهو اللي يكتب مش لازم يقلب سحنتو
--------------------
فحل بصل دقيته علي دماغة انفلق . . . دمعتي من مقلتي فرت وكلي اصبج قلق . . . يا تري انا اللي ظلمت البصل . . . ولا البصل من الافترا لعيني حرق
--------------------
كحيت فط قلبي بين ضلوعي وإنفزع. . . صعب عليا قلته مالك يادي الجدع . . . دي اسمها مياصة علي حبة دلع . . . نبض قلبي وقال كح زي اللي كج قام قلبه انخلع
--------------------
قضي القاضي علي قلبي بالغرام . . . قلبي نبض من رهبته وارتعش . . . عصفورة طايرة قالت مش حرام؟ . . . دا لسه من صدمتو فايق ويادوب انتعش
--------------------
داسني قطر قلبي انفرم . . .لملمتوا في شوال الشوال اتبرم. . . رميتوا علي الاسفلت ياحسرة انخرم . . . سبتها علي الله قام نبضو انتظم
--------------------
حدثتني نفسي عن رفيقة الدرب قلت . . . ايا نفس عمن تحدثيني . . . ان كان لي في دربي رفيقة . . . ما كان ضاع ما ضاع من سنيني
--------------------
عصفور علي شباكي غرد قلبي انشرح . . . نقر علي الشباك منقارو إتجرح. . . ضمدتو بمنديلي نظرلي بمرح . . . قال اللي رزقني بيك يرزقك بالفرح
--------------------
نهر اغتسلت فيه من همي واحزاني . . . لا جف النهر ولا كفاني . . . نفسي حدتتني اتوضي واغتسل تاني . . . واركع لربك تنول كل الاماني
--------------------
زرعت نبتتين ف صبح عليل النسايم . . . فتحوا ورود تشرح القلب وتزيل الغمايم . . . ولادي ربنا يحيميهم حمي دايم . . . ويبعد عنهم لؤم اللئآيم
--------------------
نحلة وقفت علي زهرة ترانزيت . . . عبت تنكها عطر فواح وزيت . . . طارت وفـ قلب بيتها حطت انا بصيت . . . سبحان اللي ملاه عسل مش زي أي بيت
--------------------
ليالي الناس من فضه بس ليلتي دهب . . . هيا شقية صراحة بس الاكادة اخر ادب . . . كام من متيم قلبو انكسر ومين بسببها انضرب . . . اشوفها نايمة اقول ملاك سبحان من وهب
-------------------- يا مصر يامه يا ولادة . . . لا يوم حددتي نسل ولا ولدتي ف عيادة . . . فطمتينا يامه علي حبك وزيادة. . . لولا اللي فاسدينك كان فضل ليكي الريادة
---------------------
