إعتذار

آسف علي كل اللي كان
واللي لسه ماكانش

آسف
علي غدر الزمان
إللي طالنا ماسبش
برضو آسف

وآسف
علي سنين عدت
ما تحسبش
علي قلوب بارده تقتل
ما تجرحش
علي هموم جبال
ما تنزاحش

وآسف كمان
علي ناس شرها مركز
ما يسرحش
حقدها عـ القلوب قافل
ما يفتحش
بالشرور تنضح قلوبها وبالخير
ما تنضحش

آسف علي كل الظروف
آسف بملايين الحروف
آسف أقول وبكل خوف

أسفي عليكي
مش بس ليكي
آسف يا مصر

لملمت

لملمت اللي فاضل مني جوه مني ... صعب عليا قلبي ماهو حته مني ... قلت توبه أرجع للي هجر وهملني ... اتاري من نظرة لقيتني راجع ولا كاني

طااااااااازة يا ستيتوساية

إنصهر قلبي وسط جليد المشاعر والظروف ... وإنصهاره ولد جوه مني ألف خوف ... أهو داب ومعالمه راحت ... بس برضو لسه نابض ونبضه حبة حروف

حاله

مدخل طواريء
و تروللي بيشق صاله
ووشوش عليها إنفعاله
وأطبه ستات ورجاله
...
وحاله

طبيب وقال
دا جاي مخلص

الأهل قالوا
إستحاله

طب نجيب أصل المقاله
ونشرح الوضع ف عجاله

كان صاغ سليم
وعمره قضاه مستقيم
راضي حتي لو حالته جيم
حتي عنده القدس قدس
مش أورشليم

حاله اتغير وضاع
لما خاب ولدينه باع
وإشتري دنيا ومتاع
وإبتدي يشم البتاع

بقي يمر بحالات
وتحت عينه صبحت هالات
وإتبدلت كل العادات
ولما خد جرعة زيادة
إتشنج وراح في سبات
وصبح حاله م الحالات

ظهر الطبيب مطاطي راسه
البقاء لله
الحاله مات

فشل

فشل في فشل
مضروب بيك المثل
غرقان في النطاعة
كانها عسل

من يوم ما بقيت وزير
ثقافتنا صبحت زير
الميه فيه راكدة
بقي وكر للدبابير

أثارنا صبحت نهيبة
وبهيم بيتكرم ف زريبة
ولا التراث والمخطوطات
راحوا في نصيبه

وكل جرسه وفضيحة
توجد لها دبيحة
وفي مؤتمر تعلن
المتهم حضرتله طريحة

أما انت يا فنان
ف الكدب وب إمعان
لا فيه شعور ولا خشي
ولا حتي دم كمان

قاعد ومتسلطن
واسمي اهدافك
تنشر ف وسط شبابنا
أفكار بتسرطن

أوعدك وبذمة

بكرة حاييجي اليوم
والناس تفوق م النوم

وبعد ما كنت وزير
تسقط في قعر الزير
تسعد باصحابك
القردة والخنازير

الصنم

بلدي تعبت
والوقت مش بيفوت
نفسي الصنم يتهد
ومن امتي الحجر بيموت
واخدة سكة اللي يروح
ولو حب يرجع القطر منه يفوت
مية وكهربا قاطعة يوماتي
والصوت ضراخه سكوت
ولسه الصنم باقي
حاكم ولو ف تابوت
واللي محاوط الصنم
حاكمنا بالنبوت
ساكتين ليه يا بشر
اضرخ وعلي الصوت
زلزل الصنم وحجارته
وياموت ما بعدك موت