وسط ارضك وطينك
وخضرة علي مد البصر
وترعة تروي حنينك
ورا الغيطان لمحت الحضر
زرعك في أرضك يزينك
والحجر كاتم علي قلب احتضر
الفجر شقشق والكل سارح
عصافير تناغي وزرع طارح
وعيال بتجري حوالين مطارح
وعم سيد سايق بهايم
وبنته نادية باصة علي وز عايم
والواد حميدة فـ الجرن قاعد وقايم
وصميدة أخوه فـ الركن نايم
وعودة الأهبل علي وشه هايم
والحجة زينب نازله عزايم
سرح بي بصري
هناك بعيد
شفت الصبايا
في الغيط حنايا
واحدة تغني
وترجع تعيد
يا قطن يابيض
فتح وزيد
ولبس ولادنا
في العيد جديد
وإملا بلدنا خير
وخلي حياتنا غير
ولما مماتنا يصير
كفن يا قطن يابيض
جسدنا وغطي عيوبنا
وفي الطين نرجع
الدود ياكل قلوبنا
والكل باكي وداعي
ربنا يغفر ذنوبنا
ليست هناك تعليقات:
إرسال تعليق