مصر حتفضل غاليه عليا

تماشياً مع موجة الوطنية الطاغية علي قلوب كل المصريين فقيرهم ومليارديرهم
حاميهم وحراميهم
مرتشيهم وراشيهم
جهالهم ومثقفيهم

اهدي لبلدي هذه الهلوسة المهروشة
---------------------------

مصر حاتفضل غاليه عليا
لو اتاقلها بكل ما ليا
برضو حاتفضل غاليه وهيا
جوه ف قلبي وافديها بعينيا
فعلاً مصر غاليه عليا
---------------------------
شفت اللحمة ف الجمعيه؟
ولا السكر لو مامعكش بطاقة فئويه؟
ولا الموز ويا الخضره حتي الملوخية؟
فعلاً مصر غاليه عليا
----------------------
وعلي حضراتكوا حاتفضل غاليه
طول ما مافيش حبة حريه
وصوت الحق واحد ف الميه
متحكم فينا قانون عبوديه
-----------------------
مصر صحيح غاليه علينا
بس رخيصة لكتير حوالينا
عز ولكح وبتوع بورتومارينا
لا ورخيصة علي بتوع المهجر
ال بيقولوا امريكا تحمينا
-------------------------
عمكوا سام بيحمي كلابه
بس الكلب بطبعه
وفي لاصحابه
واللي ما يوفي لبلده
طور أو جحش نسمي جنابه
-------------------------
غلو بلادي فريد من نوعه
فقير يشد حزام علي بطنه
يخدع جوعه
وإبن العز غطسان في الفته
براسه وكوعه
-------------------------
مصر يا بلدي غلوك غالي
وحبك في قلبي مقامه عالي
لكن لما قلت باحبك
قاموا ضربوني بالكعب العالي
وقالوا عليا فئة مندسه
وفي التحقيق قالوا عاملي مثالي؟
نادي الظابط خده يا شاويش
وجعر فجأه: مين التالي؟