فين الحياه؟؟

سألتني فين الحياه؟
هرشت ف قفايا من أوله لمنتهاه
علي ألافي إجابة السؤال
أو اللي سأل ينساه
سألتني تاني فين الحياه؟؟
رديت بحبة فزلكة هوا ده سؤال يااااه !!!

الحياه شفتها في
دمعة أم في فرح بنت من يومين كانت مخطوبه
في ضحكة طفل علي شط ببضرب موجة بالطوبه
في بذرة نبتت لما وقعت فوقها كبايه ميه مقلوبه
وزعروتة أم يوم نجاح بنتها اللهلوبه
وأول خطوة قدم لرامي إبن عويضة وزنوبه
شفت الحياه في بكا طفل مولود للتو في النوبه

شفت ... شفت

شفتش حياه في شعب إرادته مسلوبه
ولا شفتش حياه في كرامه مسحوبه
شفتهاش في بشر أقواتها منهوبه
أصل الحياه لحظة أمل بين إغمائه وغيبوبه